بـــنـــدر الــعــوفـــي :=
يا سلامي سلام ٍ مثـل بـرق المخيلـه = قوم خيل المخيله يـا سعيـد الحمالـي
جاك بندر يسل السيف يركـض بخيلـه = سل سيفـك وبارزنـي ووص العيالـي
ســعــيــد الـحـمــالــي :=
مرحبا بك يا بنـدر فالقصـور الظليلـه = لكن الموت سيـلٍ مـا يجيلـه خيالـي
إركض إركض بخيلك جاك راعي الكحيله = لكن إن طعت شوري خل مشيك عدالـي
بـــنـــدر الــعــوفـــي :=
كيف تسفه علـوم اللـي يـدوّر دليلـه = شرهتي للرجال اللي تعـرف الرجالـي
يمكن ان الولد ضيّـع سلـوم القبيلـه = استشرتـه وقفّـى دون رد السـؤالـي
ســعــيــد الـحـمــالــي :=
أنت قربت نارك عنـد خشـم الفتيلـه = لكن النـار لا تحرقـك يابـن الحلالـي
والأوادم تصـرف حسـب دم الفصيلـه = وأنت والله ظنـي فيـك رجـل مثالـي
بـــنـــدر الــعــوفـــي :=
كيف تنسى علومي بيـن يـومٍ وليلـه = بيننا علم خافـي ميـر تـوّه طرالـي
ما يعرف الفضيله كـود راع الفضيلـه = وانت صقرٍ نعرفه من صقـور الجبالـي
ســعــيــد الـحـمــالــي :=
ما نسيتك ولكنـي مـا احـب الهزيلـه = وأنت تشري رخيصٍ عقب ما بعت غالي
شاعرٍ لا بخصتـه زيـن كمـل ذبيلـه = ودك إنه ما يلبس له شمـاغ وعقالـي
بـــنـــدر الــعــوفـــي :=
ما يعرف الجزيله غيـر راع الجزيلـه = حسب راع الطلب حنا نقدنـا الريالـي
ما ينقّص حقوق الناس غيـر الهبيلـه = ودك انه يسّـرح مـع رعيّـة حلالـي
ســعــيــد الـحـمــالــي :=
كل هرجٍ وله معنـى وزبـدة حصيلـه = دوك بـراد مـر ودوك بـراد حـالـي
ومن نقص حق مسلم ربنا هـو كفيلـه = ومن حسبني مكاسب بأحسبه رأس مالي
بـــنـــدر الــعــوفـــي :=
الخفيفـه خفيفـه مـا تعـوّد ثقيـلـه = هيد مبغى قهاوي يـا كريـم السبالـي
البنادم محاسـب وانـت منتـه وكيلـه = احسب احساب خلق الله وتلقى مجالـي
ســعــيــد الـحـمــالــي :=
صاحبـي لا تغثـرب بالكبـود العليلـه = الأوايـل أوايـل والتـوالـي تـوالـي
شرهتي كلها لأهـل اليمانـي الطويلـه = مالنا شرهـة تلحـق قصـار الحبالـي
بـــنـــدر الــعــوفـــي :=
أثر تمره حشف وايضا ينقّـص فكيلـه = فرق بين اليمين وفرق بيـن الشمالـي
هيه ثلث الجزيـره للرجـال الاصيلـه = كبرت الديره بفعـل اليديـن الطوالـي
ســعــيــد الـحـمــالــي :=
دلة الكيف فاحت هيـل مـع زنجبيلـه = وانت عندي مكانك بين الصفر الدلالـي
الجزيره تحت حكم السيـوف الصقيلـه = وارتفع صوت بعض الناس لالي يالالـي