يامل قلب لايع الحب لاعه=خلاه مابين الحنايا يزوعي
يرجف كما هوري تقطع شراعه=من الهواء والموج حاله يروعي
تناثرت جنبه بقايا متاعه=ولاهيكله سالم بليا صدوعي
عليك ياللي ماتغيبت ساعه=دايم على بالي ودايم بشوعي
ياداعج العينين قلبي وداعه= تكفى تصونه بين ذيك الضلوعي
ولعتني بالحب عشق ولاعه=تضلم سنه وتحس فيني سبوعي
ياحب نفسك للجفا والكاعه=وانته معك رمح وسيف بتوعي
ودايم تصوبني ورميك شباعه=ولاكل طخ يضرب الراس يوعي
خليتني يابو عيون وساعه=أمشي معك بالغصب ماهو بطوعي
يالين صارولي ربوعك جماعه=واصحابك أصحابي وربعك ربوعي
وكل شي تبشربه وسمع وطاعه=من أجل وصلك يالحبيب القطوعي
إلا الهجر مالي عليه أستطاعه=كنك تحداني على حب كوعي
حبك طبعته في ضميري طباعه=والقلب ماهو ياحبيبي جزوعي
يمكن لو أصلح لصدري إشاعه=ألقاك متربع بوسط الضلوعي
أنته أمل دنياي وكلي قناعه= مالي أمل غيرك يولع شموعي
تكفى تنسيني سنين القطاعه=أضحك ونسيني البكا والدموعي
ولجل الهوى والحب صون الوداعه=والقلب لاوصيك بين الضلوعي