أنا غريبٍ فـي الوسيعـه لحالـي=لو شفتني ياذيب.. بين المخاليـق
أخـاف لازادت عليـه الثقـالـي=وأحسب حسابي وقت صك المغاليق

أنا حبيبي لو بوصِّـف تواصيـف=ما فيه من مثلـه ولا فيـه زيِّـه
إن جيت أعرِّف وش تفيد التعاريف=زايد علـى لبنـى مـع العامريـة

ما أخذت منها شيء وأعطيتها شيء=أعطيتها اللي شالني طول عمـري
حتى طوتني طي من فوقهـا طـي=وزادت طوتني لين ما ضاق صدري

كل يوم له خيره وشره وشمسه=والناس لو هم ناس ماهم سويه
مثل الاصابع حاوية الكف خمسة=ما فيه واحد مستوي مع خويه

أنا حلمت وسد حلمي في الأول=حلمي لقيته مع رجالٍ نواميس
والحلم الأول ماهقيت يتحـوَّل=ما عاد باقي غير حلم الكوابيس

كثر الأمل ما رد لي سكب دمعه=إنبح صوتي ياأمل جف ريقـي
اليوم عندي يا أمل ضو شمعه=إيسدني وقت أتلمس طريقـي

صديقك اللي حزة النوب نايب=ويسره إليا شاف حالٍ يسـرك
وصديق لا عاوزت تلقاه غايب=كنه عدوٍّ.. غايته ما يضـرك

أنا عدايه في المخاليق نعمه=وأنا آعرفهم لاعصبت العمامة
أولهم المغرور طلاب سمعه=وآخرهم اللي ما يثمِّن كلامه