الجادل اللي سرت من نجـد مقهـورة=يحدهـا الوقـت والايــام تشقيـهـا
سرت وهي عن ديار الحب مجبـوره=غصبٍ عليهـا ولكـن مـن يراعيهـا
تنظر وراها وعين القـرب مكسـوره=علـى وليـفٍ عليـه الـروح تبديهـا
نظرة حزن تتعـب الحفاق وشعـوره=واتهل دمعٍ تكفـه وسـط اياديهـا
قامت تفكر وتجمع صـوره بصـوره=وتذكر ليالٍ وليـف الـروح ناصيهـا
وشلون حالـه عساهـا دوم مسـروره=تبغى تعـرف أي شيء يخـص غاليهـا
ماتدري إن الزمن زايد علـي جـوره=وإنـي مـن فراقهـا حالـي اعزيهـا
وأن الوضع يوم راحت زايد خطـوره=الله يستـر علـى روحـي ويحميهـا
وسط الضماير غلاها فارض حضوره=متمكنٍ وسـط روحـي عايـشٍ فيهـا
الله يذكـر زمـانٍ فاتـت عـصـوره=ايـام راحــت ولاننـسـى لياليـهـا
كنـا نشيـد غلانـا ونبنـي قصـوره=واللحظه اللـي علـى الملـه الاقيهـا
واحكيلها كيف وسط العيـن محفـوره=صورة ضياهـا تصبحنـي وامسيهـا
واشكيلها البعد والاوضـاع معسـوره=وتشيكلـي الغيبـه اللـي دوم تكويهـا
وتكتبني ابدفتر العشـاق وسطـوره=وتحكيلي عن حبها وصـادق معانيهـا
ومرات تبكي حزن وامرار مسـروره=واللوعه اللي بوسط الـروح تخفيهـا
يانـور عينـي تـرى والله معـذوره=دنيـا تفلـب عجزنـا عـن بلاويهـا
حكم القدر غصب نمشي دوم في شوره=الله ومـر حاجـةٍ لابــد يقضيـهـا
ودرب الهوى ياحياتي صعب دستـوره=يبعـد قلـوبٍ تـدور مـن يواسيهـا
وباح الخفاء والليالي حيـل مشكـوره=اتعلـم اللـي مايـدري وش بلاويهـا
والله يجمـع قلـوبٍ حيـل مقهـوره=يحدهـا الوقـت والايــام تشقيـهـا