اسمع أبياتي وأنا بانظم من أبياتي قصيد = دامك انت اللي ملا قلبي ولو عمرك صغير
باتفنن في قصيدي وأنظمه نظمً فريد = واحبكه لك واسبكه وابقى على خبر الخبير
وان بغيت من الجديد اسمع من أبيات الجديد = الذي يبقى على مر الدهر وجهه نظير
بيتك اللي داخلي قامت مساحاته تزيد = زودته أيامي اللي نقصت عمري كثير
من رحلت احساسي إني عايش لحالي وحيد = واليسير اللي تيسّر من قبل صاير عسير
اشتكي مر المفارق واشتكي بعد البعيد = واشتكي سود الليالي واشتكي طول المسير
لا تودعني وتكفى عن خفوقي لا تحيد = دامك انت اللي به احساسي تولع للأخير
البشر تطلب حقوقً وانت لحقوقي تبيد =عطني الحق الذي يدعى بـ( تحديد المصير )
قدّر احساسي وأنا من هالبشر ماني حديد = لا تصير أقسى من أيامي عليّه .. لا تصير
الشقى عيا يروح أصل الشقا دايم عنيد = والليالي عذبتني والخفايا بالضمير
والسعاده حطها المولى وسط درب السعيد = لو غفل عنها تجي وإليا تأخر ما تطير
والشقى لأهل الشقى يبقى على الوضع الشديد = ما رحم طفلً صغير ولا سلم منـّه كبير
موعد العيد اقترب والعيد يا ليته يعيد = لكن العيد الذي دونك ولو طوّل قصير
لا فقدتك ما أقول إلا متى ذاك الفقيد = يرجع وينهي معاناتي مع الوضع الخطير
ما قدرت أنسى غلاك وما لقيت اللي يفيد =كيف أبنسى واحدً مالي على عشقه نصير