الضلع ياالمزبان عن فيته مال=وساقت سحابه من ذرى الضلع غادي
ويوم استعزت واركز الغيث همـال=والدار شربت ديم وبل الردادي
علَّيْت في ديرة بني يوب منزال=منزال ما بين الدحو والزيادي
اللابة اللي للمغـاوير مدهـال=حمر العيون ومرهفين الحدادي
اللي لهم مع ربعتي عد وعقال=وقت النقا يوم النقا والشدادي
يالعين شوحي واتركي دل الانذال=شوحي على مد النظر في المهادي
إن كان دار الوقت للعدل معدال=معدالها في يدين بيض الآيادي
غير أتهيض وآتمثل بالامثـال=وأقـول للي يسفهون المنادي
اللي وضعهم بالوطى زايد المال=ويثورون الملـح دون الزنادي
أهل الحمية ما يعدون الافعـال=وأهل الفعـايل فوق وسق الشدادي
هذي علومي يافهد جات بالفال=وعقالها ياالذيب ضد المعادي