لاهب ذعذاع النسيم الشمالي=هبت على القلب المعنّى طواريه
ومرن علي مراودات الرجالي=روابعن غيبي على الناس تبديه
احط من بين الضلوع النحالي=وتبين الايام شي(ن) مخفيّه
وقمت اطرد الذكرى بوقت(ن)طرالي=نفسي تتوق ان حل للبال طاريه
ليا طرالي قلت ليت الليالي=تعود له واعيش مره وحاليه
يمرني لو ما يجيله مجالي=دايم على بالي وعيني تراعيه
ذكراه تنعشني وتملك خيالي=اسج له سجات غالي لغاليه
والله لو سولف علي الموالي=ما رد لو كثرت علي المشاريه
ماهو كبر لكن شي(ن) ابالي=يصدني في عالم(ن) غير موحيه
الايام فيها كنت داله وسالي=والورق ماتشكل عليه غوانيه
تحت السحاب اشرب قراح(ن) زلالي=قبل الذحاح يقدم الكاس ساقيه
ياوقتي ارحم ماش شي(ن) بقالي=كم غالي(ن) جدّدت لوعات مغليه
لنام جفن اللي من الهم خالي=سامر نجوم الليل والهم يكويه
اطرد ورا سنين(ن) قفاها الزوالي=مرواحها والله ماني بناسيه
مرواح طير(ن) عند راعيه غالي=عصرية(ن) والريح صلف(ن) وقافيه
وجدي عليها لو توجدت طالي=ودمعي عليها ميت الغصن يحييه
ان قلت وقتي يابشر ماصفالي=عفوية(ن) ماني على الناس شاكيه
وقت(ن) يقص مروبعات الحبالي=قد قالها بندر بقاف(ن) موفيه
وصلت مدري وين ياهملالي=لكن قاف(ن) يحزن اللي يغنيه
من مبتداه الى نهاية مقالي=شخص(ن) ذكر ماضي زمانه ويرثيه