ملتقى قبيلة حرب الرسمي - الفقير يذبح الشاه لازرته

سقالله زمان البدو والبيت والفانوس
زمانً تبنته الحضاره وغيرته
يوم البدو ترسل من الطيبين عسوس
يشوفون برق الخير وشلون باذرته
وبيت الشعر مدهالهم والرجال جلوس
وفنجالهم طيب النوايا مبهرته
وليا هرج رجال تصمت جميع الروس
في مجلسً ماحدن سمع في مشاجرته
واحدن على الشنه يغني على المنكوس
ويذكر زمانً طيب ناسه مسطرته
زمان البداوه راح بس النقى ملموس
والطيب والنوماس للطيب اذخرته
وانا مالحقت البدو لكن اخذت ادروس
قصصهم تهز الجاش لا من تصورته
مافيه مستشفى يعالج مرض محسوس
مريض البدو كل المقابر تباشرته
نستنتج ان البدو فيهم صبر مغروس
وفيهم صلابة باس والناس قدرته
وامن الكرم مافيه شخصً يشيل فلوس
لن الفقير يذكي الشاه لا زرته
وفزعاتهم تشفي صدر ضايقً متعوس
لو ان فيهم شخص دنياه كدرته
إلا ياكريم الوجه تسكنهم الفردوس
وتعوض اللي مات يارب بأخرته
والحمدلله ماتجينا سموم شموس
في وقتنا كل شي تبغاه ناظرته
لا سافرو فرع الجمل وانت وسط جموس
والبعض الأخر حجزه اوكيه طايرته
حنا بنعمه ياللي ضايق وفيك نفوس
واسجد شكر لن الزمن ماتخيرته
ثم التفت للقدس تلقى الطفل محبوس
وارفع يدينك يذهب الله محاصرته
والحمد لك يالله يالواحد القدوس
عداد ماخقلت الخلق والكون صورته