الضيق بيت له درايش ومدخال
 

غنيت طاروق التفاؤل للاجيال
من غيمةً غرى تساقط مطرها
لا مدورن شهره ولا مدورن مال
شعري رساله جعل يبقى اثرها
ورزقي على منزل تبارك والانفال
اللي خلق هالناس واحسن صورها
ياشاكيً همً وضيـــقً وغربـــال
ازرع بذور الخير وتجني ثمـــرها
الضيق بيتٍ وله درايش ومدخال
بس الدرايش فرخ قمري هجرها
حلق ورفرف فالسماء بس مامال
وشاف الفياض اللي سكن في شجرها
يعني تفاءل لازم تزين الاحوال
نفسك ضعيفه لا تزود كدرها
عيش الحياه الممتعه ووسع البال
خلك وسيع ابطان وانسى قشرها
واللي سواتي ينطر سهيل مازال
يبغى غيوم الوسم وشوفة مطرها
ويازينها لا شفت واد الحفر سال
والارض خضراء تسعد اللي نظرها
عيش التفاؤل وأبتسم مابه اشكال
النفس نفسك بس لا تحتقرها
وشعري رساله قلتها وسط الامثال
من غيمةٍ غرى تساقط مطرها

صح لسانك مليووووون بالفعل رائعة شعرية

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك