حروب ياعدّو هل الطيب تنعد = ترفع لهم رآيه على بيض الأشهاد
قصيرهم يلقى المعزه مع الود = ويقلط على دله بهيل(ن) وبراد
متوارثين الطيب جد(ن) على جد = متوارثين الطيب من دور الأجداد
درب الردى عن دربهم دوم ينسد = خويهم يقلط على الملح والزاد
خويهم مايشكي الضيم والضد = أقولها ولاني للأجواد جحاد
وحريبهم بيته على طول ينهد = ياصار بالموقف حكاكات وعناد
وزبن الدخيل اللي من الضيم منحد = مبطي تراهم بالمفاخر والأمجاد
وسيوفهم يوم الملاقى لها حد = هذا الوكاد كان للهرج نشاد
هذا الكلام اللي به الصدق ينشد = ومن دّور الغره على الناس ينصاد
الوايلي يقولها وافهم الرد = تاريخهم مبطي على الهجن وجياد