من صام لله محتسب باحتسابه = صان الجوارح واللسان وصميمه
يحفظ لسانه عن خطاه بصوابه = ويقول قولا صايب وفيه قيمه
وان كان مابالقول نفع ومثابه = الصمت عن بعض السوالف غنيمه
وان حاجج بنهج النبي والصحابه = ما بالمحاجج غيبه ولا نميمه
ياللي على مبدا النوايا ماتابه = وتقول اهم الفعل والله عليمه
انا عليك احتج في كل جابه = احتج حجه ثابته مستديمه
وصك الحجج عليك ابرهن خطابه = عند العقول الواعيه والفهيمه
علمن يفيد الناس يرجى ثوابه = عند الله ان كان النوايا سليمه
ومن يرجي من الغير نفع اكتسابه = مناهجه من منفعتها عقيمه
وكرم ماهو لله فقر وذهابه = لو قيل له بالمدح يمنى كريمه
وطيبن ماهو لله وش ينبغابه = هوان نفس وقل قدر وهزيمه
لو كلن بكيل المديح احتفابه = عواقبه عند التوالي وخيمه
امرن ماهو لله مسرع ذهابه = مثل السحاب ليا اقتفى الريح غيمه
دام العمل من نية اللي نوابه = نيه ماهي لله نيه سقيمه
ومن شاهد احوال الملا لاغرابه = كم من عداوه عقب خوه قديمه
الناس مبدا والهياكل تشابه = وياكم عطانا الوقت درس وقسيمه
وافضل طريق يعز منهو مشابه = دربن مبادي خطوته مستقيمه