ضروف الوقت زادة همّ راع الودّ يافوّاز=وحال الحال مايسرّك ضروف الوقت قهريّه
نشوف الميل بانواعه يشبّ النّار دون القاز=وراع الودّ من وقته عليه اضغوط نفسيّه
وكيف القى سلا روحي لصار الوضع ماينجاز=اوعزّ النّفس لي منهج وهيّه فيه معنيّه
مضالي وقت قاضي جهد ضاع الجهد دون انجاز=وضاق الجوّ في نفسٍ من اللوعات مهريّه
ولاياسع وسع ذالكون لو وسعه عجب واعجاز=على من قدّم الحسنه ويجزا ضعفها سيّه
ولا اضيّع رجا نفسي واملها بكلّ ماتعتاز=على اللي فارض الرّكعات سرّيه وجهريّه
عطيتك علم وآعرفك تحلّ الصّعب فاللاغاز=وانا مصفّي لك النّيه واعرفك صافي النّيه

لفاني خط من صاحب كريم الطبع معه ايعاز=وفيه رموز وشفرات الموده جات سريه
تقول الوقت ياخالد لفا يعكز على المعكاز=خلف مجرا الهوا عنك مابين الشمس والفيه
وأقول الوقت ياخالد عليه انت حكم تمتاز=بفكر ..توظف الأزمات فظروفك بريحيه
تكيف بل تولف للولايف احرز المحراز=ومهما عسمت فالجو تلفي رياح مجليه
ترا وبل الحيا يسبقه برق وراعدن فزاز =بعدها للمفازة انبوت عقب الري عطريه
وعقلها وبعدها بالتوكل أجعل المركاز=حذاري تقول قطعت الحبال اللي بها يديه
مادام الموت ما غرك توهب للفرص نهاز =حياة المرء فرصة وقت يسعد من عرف ضيه