كثرة ذنوبي بحاضرنا وفالماضي=ياغافر الذّنب يااللي تقبل التّوبه
الامر امرك وكلّ اللي تبي ماضي=يامجري الكون حسب اقدار مكتوبه
يااللي لحقّه ماهو محتاج للقاضي=لاداء حقّه جميع الخلق مغصوبه
ياجامع النّاس في يومٍ لتقتاضي=ولا ريب في ساعةٍ ماهي بمكذوبه
والجنّ والانس ماخلقت على الفاضي=إلا لعباده تجي برغوب وارهوبه
يامقسّم الرّزق للخسران عوّاضي=عدل القضا واللي تحاربك مغلوبه
واللي لجا في حماك ايعيش به راضي=ونفسٍ عليها غضبك اتعيش منكوبه
يارب خالد دعا والدّمع فيّاضي=مع ابتهاله دموعه جات مسكوبه
ولك الثّنا بالدّعا مجمول بالفاضي=لاتخيّب اللي دعا واعطيه مطلوبه
في رحمتك تجعله ياربّنا حاضي=تغفر ذنوبه ولا تجزاه بعقوبه
مادام عبدك عن اهل الذّنب متغاضي=يعفي عن النّاس وانت اعفي عن اذنوبه
صافي ضميره ماهو بنسان غلاّضي=مايحمل الغلّ لو يفرض له اوجوبه
الا على اللي لدين الله عرّاضي=ويسبّ سيرة نبيّ الله ومحبوبه
هذاك ماله سوى برّاق نوّاضي=الهندي المرهف اللي تقتل اضروبه
يارب انا بالقوافي خاطري هاضي=استغفرك بالشّعر ويزيد بعذوبه
وهذي قصيده وانا فبياتها ماضي=على اعترافي بذنبي معلن التّوبه