انت ياسلمان عندي بالغلا زايد نصابك=مالحقك احدٍ بهذا قبل وبعد امر المنيّه
ليت ربّي طال عمرك ماخذاك اوّل شبابك=ليته الموت المقدّر تسبقه مدّه مديّه
كل ماتذكّر صفاتك يوم خلق الله تهابك=زاد في همّي هموم وزاد فالبلوى بليّه
من كمال اصفات طيبك كلاّ ايحشّم جنابك=لابعيد ولاقريب اللي ذكر له فيك سيّه
من صفاوة طيب قلبك حبّة النّاس اقترابك=الوفا والطّيب يكمن داخل الرّوح الزّكيّه
انت قرّت عين خالك منبرا منّه صوابك=بعدك اكبر جرح جاني ماسطابي جرح زيّه
افتكرك فكل يوم فكل لحظه في غيابك=بعد ماروّحت عنّا للحياه البرزخيّه
لو تهيّا في منامي بعد ماموتك غدابك=روية الميّت حقيقه تشرح احوالك عليّه
واشتكي لك من فراقك واستمع منّك جوابك=كيف حالك بعد مافارقت دنيانا الدّنيّه
عيني اتفيض الدّموع ان شفت صورتك وثيابك=ويش عذري فالمشاعر كانها الاشواق حيّه
جعلك فقبرك شهيد الله لايكتب عذابك=تنفتح لك نافذه للجنّه اللي لك هنيّه
واطلبك ياواحدٍ ماهو مخيّب من رجابك=ياعظيم الشّان وانته ماتخفّاك الخفيّه
ربّي اتضاعف ثواب اللي صبر يبغى ثوابك=وارحم اللي راح عنّا جعله افعيشه رضيّه
عندك الغالي وداعه طالبك لاتصك بابك=ماتضيع وداعتك ياللي لطيفٍ بالبريّه
لاتمسّ النّار جلده وارحمه داخل رحابك=خلّه ابرويتك هاني فالمقامات العليّه