ملتقى قبيلة حرب الرسمي - ((( هواجيس ليل )))

بسم الله الرحمن الرحيم

الشاعر ناصر بن مصلح الاحمدي الحربي =
البارحه ماذاقت عيوني انعاس=جالس لحالي والهواجس مملّه
ومركاي كوعي والهوى هب نسناس=وفكري مع ايام(ن)وحال(ن) مضنله
حال(ن) يبدّل صافي الجو بعماس =ولا هي بأول مرة(ن) قد حصلّه
واخذ واسنّد واضرب أخماس بسداس=ومن شاف عيني حزنها ما فطنله
والشيب في شعري غزآ هامة الراس= واقبل على جنبه وقام استحلّه
وناموس فكري دايم(ن) معي بعكاس=وعلى عجل جاني بسيفه يهلّه
وفكري غدآ من نار الاشواق قبّاس=عسى السنين المقبله تمهلن له
بعض الهواجس ياعرب توجع الراس= بالذات لا جالت بليل(ن) تعلّه
هذا وانا باقي مع الفكر محتاس=واحاول اسلآ مع قصيدي واتلّه
ياليتني بهجع قبل يلفي الياس= ويقضي على باقي حياتي بضلّه
وبعض الخواطر مثل دقّات الاجراس=بليات موعد تغزي الفكر كلّه
واوقات اناظر واتمعّن باحساس =أناظر انجوم السماء المطلّه
واناجي النفس العليله بهوجاس =وادعي الهي شافي(ن) كل علّه
يشفي جروح(ن) داخل القلب جلاّس=ويشيل هم(ن) خافقي دوم شلّه
واعوذ به من كل شيطان خنّاس=ويزيل وسواسه عن الفكر جلّه
ولا باس يا قلب(ن) من الهم لا باس= لا باس يا نبض الحياه ومحلّه
وبرفع خطابي لشاعر(ن) فذّ قرناس=عندي على طيبه كثير الادلّه
يمكن الاقي عنده اليوم نوماس= ولاّ بنلفي مسكنه في محلّه
ياصاحبي وان كان بالوقت نبراس= الفكر يمّك قاصد(ن) توصفلّه
وصفة حكيم يقيس مبناه بقياس=ننشد بها في ليل ذعذاع فلّه
وصلاة ربي عدّ ما صلوا الناس=على نبي(ن) بالضماير نجلّه
رد الشاعر / حمود بن سعد بن عمران الحربي =
البارحة جاني شعر طيب الساس = بالمنتدى ماهو بصفحة مجله
ابومشاري ياخذ الأمر بقياس = رجال وافي ماتجي منه زله
حرك هجوس(ن) ساكنه وسط الانفاس = ماض الزمن قفل عليها سجله
نشكي عنى الوقت الذي يضرس اضراس = وصعب الضروف يزود الطين بله
الفكر من بعض الهواجيس منحاس = لكن الزمن لنه صفا نستغله
الؤلؤ والمرجان يحتاج غطاس = ومن مافتل قيد الصعاب فتلله
ونحذر عدو الجد والعرق دساس = لابد مايخفي ورى الضحك غله
دنيا نقابل وسطها اشكال واجناس = والذيب يلقاله ذياباً عوله
لا ضقت من جواً تقل فيه حباس = دور على خوة نشاما وفله
اللي تحمس البن في وسط محماس = وفوق الجمر للكيف مضبوط دله
واركب على اللي شمعته مثل الأكباس = اليا مشى فالبر ما حداً يزله
راعيه متعود على قطع الأرماس = يعجبك يوم أن الدريول يتله
في مشيته كنه تغطرس تغطراس = ولا حمل الحمل الثقيل احتمله
شكل الرفارف منحني مثل الاقواس = وتوايره عن الوطى تستقله
فيه الدبل يرهب طويلات الاطعاس = يا صل مواقع ماتجيها الكروله
منصاه ديره مخليه مابها اوناس = وحب القنص والبر عندي جبله
ذي وجهة انظاري وكلاً له الباس = وكلاً على ماقيل رايه يدله
يابو مشاري جاك ردي بقرطاس = واللي عقد للحبل بأمره يحله