سجيت اسلم و اتطمن على عضيب=و ابو بدر يستاهل اللي يجيله
راعي هلا للأجنبي و الاصحايب=و قولة هلا بعضيب دم و فصيله
و جيته وفاء ما ارسلت يمه مناديب = و لاهي غريبه للوفي عنوتيله
يسوقني يمه عديل المواجيب =سلك الحرير من الغلا ساقني له
وحيثه وفي راع الوفاء منقع الطيب=و الطيب كله و الوفاء ينتميله
من روس ربعن تحتمي شمّخ النيب=إليا لمس راس الزناد الفتيله
بني علي مافيه شكٍ و لاريب=يوم الملاقا و السيوف الصقيله
هداتهم يشبع بها الطير و الذيب=و عندي على ما اقول فيهم دليله
و ابو بدر منهم حصان الاطاليب=و ياقل يا اهل العرف مثله بجيله
يسوى قبيله من كبار المناصيب= و يسوى من اعيان القبايل قبيله
اللي وقف في موقف الزير لكليب=و خلا عميل القوم يبلش بحيله
و قفل على خصمه جميع الكلاليب=و خلاه عقب الطيش مثل الحليله
عضيب لطام الوجيه المغاضيب=ياحي و الله رأس سيف القبيله
سيف الحروب اللي بعيدٍ عن العيب=من هيبته روس العداء تنحنيله
الله يجيره من جميع العواقيب=و ينجيه رب البيت منجي خليله