ملتقى قبيلة حرب الرسمي - قصيده مُهداه للشيخ صلاح بن فريج الزبالي الحربي حفظه الله

بسم الله الرحمن الرحيم

هذه القصيده أهديتها للشيخ صلاح بن فريج الزبالي الحربي وذلك بعد زيارتنا له بمنزله
برفقة الشيخ خالد بن جزاء الاحمدي
وبعد حفاوة استقباله لنا اثلج صدورنا ما سمعناه منه من طيب الحديث وكرم الضيافه وحميّته لابناء قبيلة حرب خاصه وما لمسناه من حبه لفعل الخير لجميع القبائل كافه
وتبرعه السخي في كل قضيه تخص أحد ابناء قبيلة حرب ولجميع المسلمين وأفعاله تشهد على ذلك .
وهذه القصيده تعبيراً مني عن اعجابي الشديد بشخصية هذا الرجل الفاضل ومنطوقه الحكيم وأفعاله الجليله ويستحق منّا ان نُشيد ونفتخر به وبمن هم شرواه من الرجال الافاضل

سلام ياراسٍ(ن) حوآ كامل الطيب =يانجم ساطع بالسماء كنّه شهاب
سلام سطّرته بوسط المكاتيب=فيه التحيّه والتقادير تنساب
بالورد زينّته لشيخ النواجيب=صلاح ابو صالح بن فريج له طاب
اطويرشي زبالي كريم المناسيب=من لآبةٍ(ن)بالخير تذكر بالانساب
الصدق يحضابه حميد العواقيب=الحربي اللي للوفاء دوم كسّاب
فيه الكرم والجود صقر المراقيب=ريف الضيوف اليا لفوا قرب واجناب
سبّاق للعليا بعيد المحاضيب=بالسر ولآّ بالعلن عند الالباب
فعايله تطلق حجاج المناديب = يشفي قليب اللي من الوقت متعاب
ماخاب ظن اللي يجونه مطاليب=وكم واحدٍ(ن) جاله من الهم منصاب
فرّج همومه من كثير المصاعيب=وبعون ربي الفرح دق له باب
عند اللوازم نظرته كنّه الذيب=وليا نوى جاب السمينه ولارتاب
إن جاد تبرد حاميات اللواهيب=وكم نفس اعتق قبل قصّاف الرقاب
بالامس شفنا من فعوله أعاجيب=عزمٍ(ن) يذلل كل عسرات الاصعاب
يجني بفعله بالفضايل مكاسيب=فيها الأجر من خالقه يوم الحساب
لجل القبيله من شبابٍ(ن) ومن شيب= صلاح في وقت المهمات ما غاب
في مجلسه شفنا جميل التراحيب=وشبل الاسد مع دلّة الهيل صبّاب
يومٍ(ن) جاله بن جزاء بالمناديب=قال ابشروا حنّا بني عم واصحاب
قال إبشروا يامرحبا بالمحاسيب=بالفزعه اللي مابها شك ورياب
واللي تبونه من ظميري أنا جيب=للحربي اللي بالسجن صار منصاب
وحنّا معاكم بالوفاء والمواجيب=هذي لنا شيمه وفي كل الاقطاب
من شرق ولآّ من شمال وتغاريب=بالخير حنّا مدّنا ماله إحساب
وشمس الكرامه عن ذرآ حرب ماتغيب=دام التكاتف بيننا حق ما غاب
وحنّا كما وبل المطر ساعة إيصيب=فوق الثرى همّال ينبت بالاعشاب
الله يبيّض وجهك وعمرك ايطيب=والاحمدي من جزل منطوقكم طاب
وتسلم يمينك ياكريم المعازيب=فعلك يسجّل بالتواريخ بكتاب
ويدوم عزك ياعطيب المظاريب=والفخر في شرواك فصّل له اثياب
والمدح فكرام اللحى مثلك ايطيب=اقولها والفخر يزهى بالاعجاب
هذي قصيده من ظميري بترتيب=من شاعرٍ(ن) من حرب للطيب جذّاب
من طيبها جاته قراح ومهاذيب=منهو قراها رحبّت فيه ترحاب
وصلاة ربي مابها شك أو ريب=على رسولٍ(ن) بالهدايه لنا جاب

ناصربن مصلح الاحمدي الحربي