أكتب على ماقيل من غاية النص***واعرض على الشعار لو ربع حصه


والمعذرة يا الربع لو قافنا عص***ما حدن يدور حاجتن ما تخصه


لا صار قلبك من غثا الناس ممتص***وهموم بقعا كل يومن تشصه


تراكمت من فوق قلبك وترتص***وغيم سما قلبك همومن ترصه


أسجد لربك واطلبه وأنت مخلص***يرتاح قلبك من همومن تقصه


لا صار لك صاحب على الطيب يحرص***لا ضاق بالك لا تأخر تنصه


حزنك يزول ومن همومك تخلص***الصاحب الصافي على الخير وصه


اكبر خطا تبني ولا أنت بمختص***تبني عمارة من على ساس جصه


والتبع لا تجنيه ولا فيه تقنص***ولا تشري الخاتم على شان فصه


دقق امورك زين فيها تفحص***وخلك من اللي يعتلون المنصه