عرفك يشرّفني ونلت احترامي=شاعر ولك ماقفك دون القبيله
وحرفك يشوّقني وفيه اهتمامي =ياسعد شاعر له طاروقك تحيله
ياشاعر ٍ مطنوخ نلّت الوسامي=اللي يشرّف شاعر ٍ يحتويله
ويابو علي من بعد صادق سلامي=ببيات شعري واشتكي من مليله
ابآختصر واعطيك زبدة كلامي=قصيرةٍ بالوصف تقطع طويله
لوهي بديني ماقربت الغرامي=لنّي مجرّب كثرته لا قليله
وانكان شوّقني ضبيّ التّهامي=بيردّني للكيف بنّه وهيله
ساعة لقيته ليل شهر الصّيامي=في سوق يتقضّى عيونه كحيله
الله كتب لي في غرامه هيامي=حكم القدر مالي بالاقدار حيله
هذا وانا ماني برجلّ انهزامي=لاكني اوزناه خفيفه ثقيله
عطني مشوره منك يابن الكرامي=تسهم بتوية صاحبك عن خليله
ماهو بمتمنّي رفيع المقامي=تكثر ذنوبه بالهوى تنحصيله
ويصدّ عنه الله ربّ الانامي=ومن صدّ عنه الله نفسه ذليله

حيّ الكتاب وحيّ خط البهامي=وحيّ الهجوس اللي تجيب الجزيله
يا شاعرٍ فالعرف حرٍ قطامي=أصيل عرفه مكسب أهل الأصيله
لك حرف مثل الكيف يجلى عسامي=بالبنّ الأشقر مع خَضَر زنجبيله
يا مرحبا يا عزوتي يا حزامي=يوم اِصقلال المرهفات الصقيله
قدّام عمّا بك نزيح اللثامي=لا باس يا شاكِ الرموش الضليله
يا واردٍ عدٍّ وروده حيامي=عدّ الهوى ما أروى الكبود العليله
كم قبلكم صدرّ على العدّ ضامي= و دموع عينه فوق خدّه شليله
قيس الملوحّ عاش عشرين عامي=مجنون ليلى وآخرتها اِش حصيله
يا صقر صقّارك طلع خوش رامي=صاب الهدف والقلب ولعّ فتيله
والفارس اللي ما يشدّ الخطامي=وما يكبح جماح الهوى عزتيله
ماني بملحقكم عتاب و ملامي=بس أتفكرّ كيف تاه الدليله
الورد في سوقه يباع و يْسامي=واللي يهاب السوق وش له يميله!!
ليل الهوى ما ينجلي له ظلامي=وصُبحه كما برّاق صيفٍ تخيله
مدري يا خالد تبلغون المرامي=وألاّ عن الغاية تحول الوسيله
يابو عبيد إن كان ما به ليامي=قلبك لا يمشي درب ما يستويله
الودّ مسروقه في حكم الحرامي=وقاضَ الهوى مهما عدل فيه ميله