واعذاب المعنى بين حبٍ وفاقه=بين شوف الحبيّب والظروف اللعينه
احسب انّا نكلنا عن دروب العشاقه=اثر جيش الموده بالعروق الدفينه
كيف غرو ٍمدلل ساقنا في مساقه=كيف فينا تحكم لين صرنا رهينه
ان قطعنا وصاله زاد فينا اشتياقه=وان وصلنا جنابه جنّبتنا السكينه
ولو لبسنا ثياب الصبر طاقه وطاقه=ايتلخبط كياني من حجاجه وعينه
من يرد الهواوي قبل لاتجيه عاقه=من يرد الهواوي قبل يرثع بدينه
اشهد انّا وقعنا بين جهل وحماقه=عقب كنّا نوصّف بالتقى والرزينه
عقب ماكنت اسبّح بالمسا وانفلاقه=من نشيد ابورسلي قمت اجر اللحينه
لاذكرت الزمان اللي مضى والصداقه=عود القلب يرجف مثل رجف المكينه
والا قول اليمامه يوم تشكي فراقه=كان من فوق رمشي ويتمش الهوينه
قلت مثل اللي قالت بعد قطع العلاقه=كان في وسط قلبي راتعٍ في حنينه
وصار مالي جداتٍ كود نزع الطباقه=حبر الاقلام بلسم من تكشّف كنينه
والنهايه محمد لاتيبّس رماقه=ادعوا الله يبيحه ثم عزوا ضنينه
واغرسوا فوق قبره وردتينٍ بباقه=علّ ربه يكفّر مامضى من سنينه