يا سلامي على راع الوفاء والسْطر=ياقبول الرجال ويا نسل خيارها
كثر نجوم السماء وأعداد وبل المطر=قلتها بأهلها والناس بأخبارها
و الرجاجيل تعرف من وصول الخبر=وأنت من ناس تشرف ربعها أذكارها
ناس من فعلها تدوس فوق الخطر=ما عليها من القومان وأخطارها
وأنت من عزوةً لا صار يوم القشر=ناس تبعد جميع القوم وأشرارها
فعلها من يديها مثل صم الحجر=وأنت من ناس عند الناس مقدارها
ناس تتبع رسول الله ودربه عطْر=أهل الدين والطيب بأسرارها
وأبو بدر حر ولا يعود حدر=والعلوم الرفعية محرم انكارها
وليا منه عود من صلاة الفجر=صلح الكيف الأشقر من جمر نارها
يحمس البن الأشقر فوق حمر الجمر=ونار أبو بدر موسع وجارها
ولا أنحمس يدقه بوسط النجر=ودلةً من يمينه زايد بهارها
والحطب في وجاره من جذور السمر=ولا يطب كيفه اللي يضغط أزرارها
وأبو بدر كريم وصاحب دين وفكر=والله يعز ناس الدين بأفكارها
يا سلايل رجالاً مثل صم الصخر=ومن يروز الجبال اللي هذا كبارها
والكرم عند ابن مقبل مثل البحر=ويأخذ الميمنة ويترك أيسارها
والعلوم الرفيعة دونها ما قَصَر=ماسك أطوالها ومتجنب أقصارها
يا بو بدر شهادة أنك حر وندر=راع الدين والجزلات مختارها
والصقر دب الأيام يبقى صقر=ما يجيب الردية ولاله بديارها