ملتقى قبيلة حرب الرسمي

واهني منه مات فاول شبابه =ولا شاف ماشفناه والراس شايب
اليوم حنا في زمان الغرابة = يا ما نشاهد من كثير الغرايب
عشنا وشفنا ميلة وانقلابة = بان الخطا والحق حاضر وغايب
لبس الخطا ثوب(ن) وغير ثيابه = ويسترونه عن جميع العوايب
يلبسونه خير ياللعيابة = واصبح حلو في وسطه السم ذايب
الفرق شاسع والوجوه اتشابه = الوصف حالي والمعادن كذايب
بالزور والبهتان صاغوا صوابه = من قبل هذا الوقت ماكان صايب
حنا العرب والله عطانا كتابه = لو احتكمنا له كفانا النوايب
اكتاب بين رحمته مع عذابه= والموجبات مبينة والسبايب
لوكان نخشى الله وندراعقابه =ونخاف يوم الحشر هول الكرايب
تسعى ونطلب رحمته مع ثوابه = ونطلب منه دفع الفتن والمصايب
ونطلب منه يضفي علينا حجابه = والكل منا عن هوى النفس تايب
هذا هو نهج النبي والصحابة = محكمين الدين في كل نايب
الدين وحدهم وصاروا قرابة = بعد الشقاق الكل صاروا قرايب
واليوم جا د ستور مايقتدابه = رسامته مابين خايب وعايب
العلمنة لاعاد وقت لفابه = شالوا نظام الدين حطوه نايب
لازم نحارب من سعى به وجابه = يطيب له والا على غير طايب
الي دعا به قام يفتل شنابه = وبوزع الجمهور حزب وكتايب
من مال خلق الله يجمع حسابه = ابدال مايعطي يوزع ضرايب
في دارهم شنوا فنون الحرابة = والناس عانو من شديد الحرايب
قتل الاوادم مثل قتل الذبابة = والذبح بالجملة بليا سبايب
كم يتموا طفل في سن الدعابة = كم ارملة تشكي فراق الحبايب
غير الصويب الي صوابه غدابه = ياكثر ماشفنا فالامة صوايب
واموالهم راحت عليهم نهابة = ماجمعوا فالعمر يوخذ نهايب
حتى العمار الزين عود خرابة = بيوتهم راحت دمار وخرايب
كم حاكم ظالم وحوله عصابة = والناس من حكمه تشوف العجايب
ماهمه اللا عيشته مع شرابه = ينعم ويترك باقي الناس سايب
لاخوف لاتقوى ولاشي مهابة = حتى من الخلاق ماهو بهايب
مثل الوحوش اللي ربت وسط غابة = قويها ياكل ضعيف الترايب
هذا حرام ومن تبناه غابه = يصليه ربه وسط نار اللهايب
حب الزعامة والزعامة مثابة = عشق الرجال مروضين الركايب
ماتستوي لاهل الخنا والخيابة = عرش عظيم ولاتجي باللعايب
خيالها من لانوى الزين جابه = بالطيب والنوماس جت له غصايب
قالو ربيع وقلت مافيه ثابة = ماطال منه الناس غير النشايب
لعل هالمرباع ينصك بابه = ماهو ربيع ومن سعى فيه خايب
ربيعكم ماغير هم وكأبة = ماهو ربيع ام الشحم والحلايب
ربيعنا ينشيه وبل السحابة = نرعي خضاره فالسهل والهضايب
لعل مايبطي علينا غيابه = يفزع به المولى جزيل الوهايب
قلته ونا حربي عريب النسابة = ميقاعنا دايم في روس الرقايب
يالله طلبتك طلبة مستجابة = عفوك ليا حطو علي النصايب