بسم الله الرحمن الرحيم=
هلا والفٍ هلا يامن وهبني في هواه اقدام=هلا يامن عطاني فرصةٍ للوصل مهديها
هلابك ياملاكٍ مالكٍ قلبٍ بحبه هام=هلابك ياشقيق الروح وامرها وناهيها
هلايا نسمةٍ في ليل نجد تداعب الارسام=هلا يانفحة ازهار الربيع الي سرت فيها
هلا ياروعة ابداع الفنون بلوحة الرسام=هلا يادرةٍ المال كله مايلاديها
هلا يالهفة القلب العليل وبلسم الاسقام=هلا يابسمة الطفل النضيف ايلا ابتسم فيها
هلا ياغاية اشواق الغرام ومنتهى الاحلام=هلا يالهفة النفس الشفوق لشوف غاليها
هلا يامنبع احساس الضمير ومصدر الالهام=هلا ياشرهة ابيات القصيده يوم اسويها
هلا يامنتهى حلم القصيد بلحظة الآلام=هلا ياترجمة صدق المشاعر في معانيها
هلا دمعة محبٍ من جفا غاليه جرحه دام=هلا بك رد فعله من معاناتٍ يعانيها
هلا ياغاية الشكوى هلا جبرة عزا المنظام=هلا يالوعة الهجران ياعبرات راعيها
هلا يازهى مقاسات الجمال الي عليك وسام=هلا يامن بقى ملح الطفولة كامنٍ فيها
هلا ياخف دم وظرف بالمعنى الصحيح التام=هلا ياحلا السجايا الي بك الخالق موفيها
هلا باكمل وصوف الحسن كاسٍ رايع الاجسام=هلا عقلٍ رزينٍ وسيرةٍ تسمو مباديها
هلا عذب الكلام وصدق علم ومنطقا الاعلام=هلا يامنطق الحكمه ومالكها ومبديها
هلا حلو النبا نبع الوفى تاج الفخر لك شام=هلا ياعزة النفس الكريمه من معاليها
هلا بك ياعذاب البيض عنهم لك مقرٍ سام=هلا بك شمس لاطلّت نجوم الكون تخفيها
هلا يامن يوشح ليله الحالك ضحى الايام= نهارٍ مشرقٍ حوله سدول الليل مرخيها
هلا يامن توارى وجنته في لحظة السلهام=كسا حمرة خجلها رمش عينه حين تغضيها
هلا يمن بثغره ملتقى الاضداد باستسلام=تلاقى الشهد مع صف البرد مع جمر اشافيها
هلا ياطلة الوجه البشوش المحتشم بلثام=هلا نجل العيون الساحره لاسلهمة فيها
هلا حلو النقاب الي على وردة خدودك نام=تحليه العيون الناعسه لحظة تجليها
هلا بك ياسواليف النقا في مجلس الحكام=هلا بك يامكاسر عودٍٍ ازرق من غواليها
هلا بك عشق شيخٍ للمراجل والوفي جزام=هلا بك نوهة الشهم الكريم الي معليها
هلا بك واقعٍ زاهي سما عن تافه الاوهام=هلا بك سيرةٍ عطره لباس الفخر كاسيها
هلا بك مهرةٍ من خيل اصايل معربات كرام=هلا بك شيخة المضمار كل الخيل تتليها
هلا بك واسعد الفرسان من علق عليك لجام=وشده في يده والفوز بك نفسه يهنيها
هلا بك ياهنا عمر الشريك الي وصاله دام=هلا بك ياغناته في حياةٍ معك يقضيها
هلا يك ياهلا كل الهلا حشمة نفوس حشام=هلا بك في بيوتي من يدايتها لتاليها