أشوف البلد كثرت عليها المراويح= مراويح عجّ، الله يجيب انفراجه
تقافا علينا مثل حب المسابيح= يجي بين عجّه هي و الاخرى عجاجه
الا يالله اللي سيَّر النود و الريح= و خلى قراح الما يجي من هماجه
تغيث البلاد و كفّ عنها السواميح= و فكَّه من اهل الشوشره و اللّجاجه
بلادٍ تقيم احدود ربي المساميح= بها الدِّين سايد و المساواه تاجه
بها الرجل من تِرثة رجالٍ مفاليح= كريمٍ، على الضيفان طلْقٍ حجاجه
الى جاه ضيفٍ صار للحيل ذِبِّيح=حريصٍ على ضيفه و لو هو خواجه
ذبيحته كبشٍ اقرنٍ في الغنم تيح=و لا هو من اللي يذبحون الدجاجه
و لا به عيوب الا بأكل المفاطيح= و معه كسترول و ضغط يصعب علاجه
و الى قلت له خفِّف يقاطعك و يصيح= يقول العمر واحد، و خلّ السماجه
مطحطح زمانه من رجالٍ طحاطيح= يبا يمشي الدنيا طواع بمزاجه
و ابه عيب ثاني؛ شيل كثر المفاتيح= بجيبه يزمزمها و لو ماش حاجه
و يغرق بشبر الما و لهوب سبِّيح= يقول الرياضه سكّةٍ للمراجه
الا يالله بمزنٍ تجي نشو لقَّيح= يجي سيلها غدقٍ و يكثر خراجه
و يحيي جلال العُود و الرعي و الشيح= تربِّع بها البلها و تشبع انعاجه

المشاركة الأصلية كتبت بواسطة خالد الحصني (المشاركة 1223237) صح السانك شدني العنوان صح السانك لاهنت

المشاركة الأصلية كتبت بواسطة رابح الجحدلي (المشاركة 1223341) صح لسانك مليون على القصيده والله يـعـطـيـك الـعـافيـــــــــــة بيض الله وجهك

صح السانك وبيض الله وجهك
قصيدة رووووووعة

المشاركة الأصلية كتبت بواسطة الجرح (المشاركة 1223401) لاهنت وصح السانك تقبل التقدير والاحترام وفقك الله

المشاركة الأصلية كتبت بواسطة العطيب (المشاركة 1223407) و ابه عيب ثاني؛ شيل كثر المفاتيح= بجيبه يزمزمها و لو ماش حاجه هههههههههههه هذا حراامي صح السانك وبيض الله وجهك