البارق اللي هاضني قبل امس=كل الخبر في راس عساسه
عطنا السوالف يا بعيد الرمس=من واقع التحليل ودراسه
اصدح بقولك لا تكلم همس=وافرق حديد السوق والماسه
الحق واضح مثل نور الشمس=لو حطوا الغربال شماسه
واللي طمس نور التكاتف طمس=يلقا شراب المر بالكاسه
بالمجتمع لابد يطلع نمس=من مزبل التاريخ وانجاسه
خلف الستاير فوق زر اللمس=مابان لازوله ولاراسه
بحر الردى مغموس وسطه غمس=يلعب به التيار بلباسه
اما نتايج حقد وإلا مس=وإلا خشير ابليس بالطاسه
ابراي لله في عروقه دمس=يوم العروق الخضر دساسه
يا ما حمسته مار باقي حمس=دايم دقون الخبث منداسه
اربع زلايب وان تعدوا خمس=واشهر فعول الشيخ منكاسه
من قال منهم مابعيني عمس=دقت طبول الحرب واجراسه
اربط شبيهك في محلك وامس=الخيل تبغى عرف وفراسه