ملتقى قبيلة حرب الرسمي - ردية بين عبدالعزيز الزبالي وعبدالرحمن عايش الزبالي

(عبدالعزيز)

ياأبو بدر طال الحزن والعمر راح =ماذقت لدنيا طراه وحلاوه

صديقي اللي يكتم السر به باح=ضيع علومه جهل مدري غباوه

الصاحب اللي كنه البرق لا لاح = دار الزمن وأضفى عليه بقساوه

ماني من صروف الهواجيس مرتاح =ضيع سلوم المرجله والبداوه

ماعاد باقي غير أناديه ياصاح =الطعن في ظهر المقفي عداوه

ترى الرجال صدورها طيب فواح =وتكن لك في القلب طيب ونقاوه

وبعض العرب فقلوبها سم(ن) ذحاح =نفسه من ذنوب البشر في عماوه

شاع الخبر بين العشية والاصباح =وياكثر عدواني في دنيا الشقاوه

أصحابي الأدنين رماية الشاح =تغني عن أهل الكذب وأهل الفضاوه

(الـــــــــــــــــرد)

(عبدالرحمن)

ياأبو فهد وأنا لكم زند قداح =واللي داوه الكي بيديك داوه

لاتقضي الدنيا على هم وجراح =وعاذلك يكسب مبتغاه بجراوه

بيع الردي بالبخس وأبشر بالأرباح = من رفقته ترفع بها الراس خاوه

ياكثر من هم بين الأصحاب سواح =يوفون دام الوقت جوه طراوه

معاك ذيب ولا تقفيت نباح =في عشرته ذنب عظيم ورخاوه

ومدام معك حزام وفي يدينك سلاح =علمك صريح ولا يبيله غباوه

خلك من أهل الصدق وبالحق صداح=لو كان قولك مايحقق رضاوه

الله خلقنا وجند جنود الأرواح =متوالفه ومتنافره بلا سطاوه

وأسلم وسلم بدل الحزن باافراح .= مدام في عمرك نشاط وصحاوه