ابشرو بسهيل ياللي تحترونه = اعلن الارصاد باقنله ليالي
مبطيا" عن شوفته شكله ولونه = مادرا انه عندنا بالحيل غالي
في مكانه معتلي ماله مهونه = من كبر قدره تمثل به رجالي
والوسم عقبه ليا صدق مزونه = يفرح البدوان راعين الحلالي
لانشى نشو القنوف وفي بطونه = يرزم الرعاد وبروقه تلالي
ومتراكم جانبيه مع متونه = ولاتشبه روسه الا بالجبالي
ثم سمى بالله الرحمن عونه = ولاش غير الله منشي للخيالي
لينها قامت تشعط به ركونه = من هماليلا" عريضاتا" طوالي
وشاعت الاذكار من ما يتبعونه = كل وادي ماوطاه الا وسالي
كل وجهه حصلت مافي حضونه = ورويت الريضان وانكف السوالي
وانجلى واليا الشجر تلمع غصونه = واصحت الاجوا منضارها خيالي
لين باذرها بثالث ينظرونه = والوطى كاسيه خضره والعوالي
بذرها من كل شكل" من نمونه = بعد سابعها وهو للشبر طالي
منوة الصقار واللي يصحبونه = خيرة الاصحاب قرمين العيالي
والنوايا موقعا" يومه يجونه = صحصحا" مشمل عن طريف الشمالي
جهمتا والطير يكشف عن عيونه = والحباري لاتخير من موالي
وش هوا بدر العريمه تعرفونه ؟ = والله انه هو هواي وشف بالي
ينجلي هما سوات الكون كونه = عن سهيل وطلعته ماني لحالي