ياللي كشفت السوء عن عبدك ايـوب = مـن بعد نـادالك ولبيت دعــواه
مـن علتن دامـت معه وقـت محسـوب = عشـر وثمان إسنيـن محـدٍ تلقـاه
لين الخـلا اصبـح رفيقــن لايــوب = والضـر فـي جسمـه تبـلاه خـاواه
إلا انت يا معبود يا غافـر إذنـوب = شافـيت سيـدنا بعد كـل ما جـاه
بي هـم خلانـي مـع الوقـت مكـروب = كرب السجين اللـي دمـوعه تغشاه
مصدر عليه الـحكم بالضبط مكتـوب = مـا باقـي إلا ينتـظر للمنـاداه
مجلوب لاهـل الدين بالقيد مجلـوب = مجلـوب واهلـه يطلـبونك لنجواه
ليه شقيقـن كــدر البـال مصيـوب = مصيـوب مــن داءٍ صعيبـن تبــلاه
جاه المرض قـدام لا يكـسب إذنـوب = طفلـن صغيـرن ما تهنـى بدنياه
ياكـم سعينابه وكـم ضـاقت إدروب = مافادنا سعين مـن اجلـه سعيناه
حتـى الاطبـا قالو الـراس مضـروب = ونسبة نجاح الطـب ما هي بجدواه
يالله انا راجيك ولـي فـيك مطلـوب = انت اللذي ما غيرك العبد ينصاه
اسئلك خالـد بالشفا تلبسه ثــوب = انـت الكـريم ومطلبـي فيك يا الله