|
ديوان الشاعر عبيدالله ابن عويظة ابن ظفر المرواني
عبيدالله ابن عويظة ابن ظفر المرواني الحربي الميلاد 1/ 7 / 1335هـ توفي في 8/2/ 1429 هـ ليلة الجمعة ودفن في مدينة البكيرية شاعر : شعره جيد يكثر في شعره الحكمة نختار من شعره هذه القصيدتين كأثبات لشاعريته ودليل على قوة شعره الجزل وشعره يحتاج إلى ديوان كامل ليس هذا محله : في هذه القصيدة يسند على جبل غنيم وهو جبل اسود طويل يقع بين العمودة والموشّم , ويخاطب الجبل وينشده عن ربعه وخوانه الذي اخذهم الموت قدامه , ويستعرض على خياله تلك لأيام الحلوة الذي قضاها معهم : ابا نزل ماجدت له من شعر وللي يعرف له شي غير هذا ينزله في هذا الديوان |
https://www5.0zz0.com/2023/05/09/22/566915325.jpg
يا غنيم ما عينت ربع غيابي = هذي منازلهم قديم السنيني عن الغباء منزالهم بالروابي = متبينات بيوتهم بالبطيني اهل الشجاعه والمواقف تهابي = مرين حلوين مع الطيبيني وليا لفوهم متعبين الركابي = قالو هلا في نقوة الغانميني والبن الاشقر بالدلال العذابي = وبصحونهم تنظى فقار السميني واليوم حتى ذكرهم مايجابي = ولا اسمع لهم طارئ مع الحاضريني وانا وراهم بالشقاء والعذابي = واللي لفا الشجعان يبي يجيني يالله ترحم وحشتي واغترابي = في ليلةٍ فيها وحيدا سجيني لابد من قبرا غماءه الترابي = حتى هبوب الذاريه ماتجيني حنا نهاب الموت ومنه الهيابي = مير البلا الروعات ومحاسبيني كيف انتعجب والليالي قرابي = ياهل العقول الطيبه واليقيني نرثع مع الدنيا ليالٍ اتعابي = والاخره عن علمها غافليني دنيا كفى الله شرها بقتلابي = تعبروا في حالة الاوليني وصلاة ربي عد رش السحابي = على النبي الهاشمي مخلصيني |
وله أيضاً هذه القصيدة يرثي فيها اخوه معيبد بن عويضة الذي توفى في حادث مروري في شهر شعبان عام 1408هـ الله يغفرلهم جميعاً عديت في راس الطويل المرجم = اباتعزى في طويل الرجومي ابا تعزى والجسد داخله سم = والعين عيت من بلاها تنومي البارحة مانمت بالليل الاظلم = يوم العرب نايمين ماغير احومي حرق علي غليم قال ياعم = عليه من دنياه كبر الحزومي عليه من دنياه شي تعظم = وعينه تهل دموع والقلب يومي واليا دنا الماعود تجري له احكم = شي على كل القبايل عمومي وخانت الدنيا علينا تثلم = قامت تواعد بالخطا والثلومي لاصبّحت من واحد به تنقّم = واللي على الدنيا مداه الندومي يامل قلب كل ماجيت مع يم = عيا يمومه لا يوافق يمومي قلبي عليه من المشاكل تراكم = تلوف قلبي مثل لوف السمومي وعيني اللي كنها فايح الجم = الله يلوم اللي لعيني يلومي دمع يفوح وتالي الدمع به دم = على النشما طيبين السلومي لبسوا جديدٍ دخلوبه محزم = وهاذيك تاليت الخبر والعلومي اتلى الخبر يوم اظلم القبر يدهم = وحطوا عليه من النصايب رسومي لو ينفع التمجيد كان اتكلم = ابجيرة الله يالعيال القرومي ياعلكم برياض جنات وانعم = ورحمة من المولى عليكم تدومي ماغير اكابد عبرتي واتعلم = واشكي على رب لطوف رحومي انه يعاوني على الصبر والهم = ويعوظني منشي سحاب الغيومي يا غافل بدنياك شوف وتولّم = شوف الضعون الماشيه يا مغنومي ولّم زهابك و ارتحل للمقدم = لابد من يوم عليك القدومي ماتنفعك دنياك لاقيل لك قم = خل العيال وخل لبس الهدومي الله خلق دنياك فيها تفهم = ولا تنفع التوبه نهار الهجومي وحاذور لا تقرب حرامٍ محرم = ولا تظلم المسلم تراه امحشومي تراه عند الله شجاع مكرم = يسمع له اللي حاضرٍ ما ينومي يوم به ام قرون تقضي من الجم = يوم الشهود احضور في كل يومي احدن ينال الخير واحدن تندم = اسباب ذنبه ورّده للجحومي الشاعر : عبيدالله بن عويظة بن ظفر المرواني |
هذي مجاراة من فالح عبيدالله لقصيدة عبيد ابن نصيف اللي رثا بها والده
بديت بسم الله والعبد مامور = والعمر مزروع من الله زراعة لو هو بمال ماعلى ابوي مذخور = وامر الولي ياعبيد مابه جزاعة مشكور ياللي تطلع النور مشكور = ونصبر على الدنيا بمعزم وشجاعة حركت قلب من عنا الوقت مقهور = غلاه وسط القلب مثل الطباعة عساه في جنات وانهار وازهور = وفي جنة الفردوس يوم الشفاعة عساه في جنات والذنب مغفور = وامر الولي مالي عليه استطاعة وسط البكيرية تركناه مقبور = فارق عياله والاهل والجماعة الشاعر : فالح عبيدالله بن ظفر البكيرية : بكيرية القصيم المعروفة |
هذه مساجلة بين فالح عبيدالله العويضة وبين والده عبيدالله العويضة , والبادي فالح البارحة نومي هواجيس وافكار = سهران ليلي والعرب نايميني اقالب الجمبين كني على نار = واقول يامعبود يالله تعيني سبت غزالٍ حط بالقلب مسمار = غرون جديد اللبس عقلة رزيني يابوي انا ضايق وابي منك الاخبار = لي مدةٍ والنوم عيى يجيني ومن الخفارة ضقت والقلب محتار = وش السبايب خطكم مايجيني فالح بن عبيدالله بن ظفر المرواني وهذا رد عبيدالله عويضة ابن ظفر على ابنه فالح العبيدالله العويضة ياهل الوانيت اللي مع القار عبار = هذي وصاتي جعلكم سالميني الله يعديكم لوابيث الاخطار = ولعلكم في دربكم غانميني واليا لفيتوا وصلوا غيب الاسرار = بيني وبينه والعرب غافليني والحاجه الي عندنا مابها انكار = والهرج واجد والصحيح اليقيني وأفطن ترا بالناس مبغض ومكار = وترا الردي لو زنتله مايزيني يدرق مع الغفلة ويجدعك بالنار = وايضا لزلاتك فهيمٍ فطيني وأبعد عن القشران عميان الابصار = ترا المعاصي للرجالة تهيني خلك مع الشجعان وافين الاشبار = اللي يحبون الشرف فايزيني لياحتجتهم في حال زادوك بافكار = وسيفٍ على يمناك يلمع سنيني عبيدالله بن عويضة بن ظفر المرواني |
وهذه القصيدة لفالح العبيدالله وهي تكلم عن تغيرات الدنيا وتقلبات الأيام كما يذكر شوقه للماضي وبيوت الشعر , وحيات البدوا الرحل ومنازلهم اثناء الربيع وورودهم على المياه وما إلى ذالك من حيات البادية : يالله ياربنا ياعالم الحالي = يالي خلقت الخلايق وانت واليها تغفر ذنوبي يارب البيت ياوالي = يارب عني جميع ذنوبي تمحيها امس الضحى مرقبن بالمرقب العالي = ابدي ببيوتٍ قوياتٍ معانيها اوجس بصدري تقول رجاف زلزالي = افكر بحاضر الدنيا وماضيها ماكل زولٍ يعوض بعض الإزوالي = ضروف الزمن قاسية والوقت يطويها ماكل حيٍ يحصل كل مانالي = والطيبة يافتى من حض راعيها بيت الشعر له مكانة عندنا غالي = بالبر كانت بنات البدوا تبنيها مروبعاتٍ لها بالبر منزالي = والبل ترتع وراعيها يباريها مركوبهم خيل يوم الجيش زرفالي = وقلوبهم طيبة والحقد مايجيها البادية صابرة باالمر والحالي = كرامة الجار والضيفان تقريها لياشبوا النار حطو فوقها دلالي = وسوالفٍ طيبة ورجال ترويها ادليّهم يرشقن الماء على الجالي = ووالورد لوهي كثير البير تسقيها ناسٍ كلاهم زمان كله اهوالي = ماتقل داجواعلى الدار وحراويها دنيا تقلب من الاول على التالي = كثرت فتنها ولادري وش خوافيها ذكراي لمي وابويه دوم مازالي = لوطالت ايامها ماني بناسيها يالله ياللي عليم بكل الاحوالي = أمي وابويه ونفسي لاتخليها وكل الاجاويد في رحمتك يالعالي = ياغافر ذونب الأمة عالمٍ فيها وصلاة ربي عدد قيعان وارمالي = على نبيٍ ابعث للناس يهديها فالح عبيدالله ابن ظفر المرواني |
وهذه القصيدة لحامد مدخل العوفي الحربي , يمدح بها قبيلة المراوين عند ماجاورهم , ويسند على أبنه زيد عند مااتصل عليه يسئله وين نزل , فأجابه والده في هذه القصيدة : منـزالـنـا يـازيــد عـنــد الـمـراويــن = ريـف القصـيـر وكاسيـبـن النفـايـل ذباحة الحايل علـي العسـر واليـن = سـوالـمـاٌ يـازيــد نـعــم الحـمـايـل دروز الرجال وبالمجالـس سلاطيـن = زمل الحمول اللـي تشيـل الثقايـل متوارثيـن الطيـب مـاهـم حديثـيـن = كسابة الناموس نعم السـلايـل بضيافـة الاجـواد مضيـت شهرين = وانـا علـي مـا اقـول عنـدي دلايـل دفـانـة الـركـبـه نـهــار المغـيـريـن = اليـا طـار ستـر منقضـات الجـدايـل عسى لهـم فـي جنـة الخلدعليـن = نطاحـة الواجـب بصـدق وصمـايـل مـا فـكـروا بمحـسـبـيـن الـمـلايـيـن = سهاجـة الواجـب عساهـم قـلايـل ياعبيد لـو قلنـا مـن الشـعـر بيتـيـن = مـانـقـول شاعرلونـجـيـد المـثـايـل عـذري عـن التقصيـر وانتـم غنييـن = لو كـان مانحصـي جميـع الفضايـل صلو علي اللي وضح الحق والدين = اعداد مـاهـلـت مـــزون الـمـخـايـل الشاعر حامد بن مدخل العوفي الحرب وعند ماسمع هذه القصيدة , الشاعر : عبيدالله ابن عويظة ابن ظفر المرواني , رد على حامد العوفي في قصيدة مماثلة , يقول فيها البارحة مانمت والناس نايمين = جتني بيوت مصطراتٍ هوايل قمت أتهجا راجحات الموازين = يازين صطرات البيوت الجزايل كلامٍ ازين من نبات البساتين = مثل حليب معبّسات الشمايل كلام ابن مدخل صعوط المجانين = لطم العديم اللي عن الحق عايل ربعه نهار الكون ماهم رديين = أولاد سهلي ناطحين الدبايل أولاد عوف اللي على الضد قاسين = عندي خبر بمقدمات القبايل ياحامد السهلي قصير المراوين = نعم القصير اليا حكا كل قايل ذكرتني بمثال مبطي وهالحين = رجالٍ تحوش الطيبة بالفعايل الجايد الله والنشامى مجيدين = طبع لهم والجود طبع وفصايل ياحامد السهلي عساهم غنيين = من يكسب الزينة رقى كل طايل الطيب مثل السلم بين الوفيين = سلم الجنيه اللي يجيب الجلايل عساه بجاه الله وجاه المصلين = يكتب لكم بالعافية والفضايل وصلواعلى اللي شرّف البيت والدين=محارب أهل الشرك وأهل الضلايل عبيدالله ابن عويضة ابن ظفر المرواني : الراوي : فالح عبيدالله عويضة بن ظفرالمرواني |
الساعة الآن 08:09 PM |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir