الرزق عند اللـي خزونـه ملايـا=مانـى لعفنيـن الطبايـع أمـدارى
عندي لهـم ذرب يخيـط الشفايـا=وهبه من المعبود ماخـذ عـوارى
هبيلهـم عنـدى لرأسـه كـوايـا=وعندى عصا موسى لمن به حمارى
وعندى لمن يبي النصايـح هدايـا=آيات وإلا مـن صحيـح البخـارى
ما خطي وارد الصاع لهل الخطايـا=ليا استحكمت مليون من سم هارى
ليـن اللسنتهـم ينشبـن باللهايـا=ومن عاد منهم له نسن الشبـارى
ارفـع أيـدي لـرب سبـع علايـا=واكفها عـن عابديـن المصـارى
رزقي يجينـى ماتحـرى العطايـا=من يد كريم كافـل الكـون بـارى
مانيب من تفرض عليـه الوصايـا=ضعيف عقـل مذهبتـه الطـوارى
ولا همنـي هيـس جـداه الزرايـا=يزرى ولا يدرى على ويـش زارى
أيديه مـن فعـل المراجـل عرايـا=هماز لماز علـى الـزور ضـارى
مطيـة لبليـس بـيـن البـرايـا=بأعراض خلـق الله بيـاع شـارى
ليا نـث،ر حبـه طحنتـه راحيـا=واذراه مع صلفات هـوج الـذوارى
دجت البحور ودجت لجـة سمايـا=وخاويت سبع الليل وسط البـرارى
ومشيت مع ساقى حياض المنايـا=وامرحت بأرض الجن والجن دارى
وجبت الذهب من وسط عش الحيايا=وأنكفت به من ضلع حوران سارى
نجيـب حـره مانجيـب الهمايـا=وبين القبايل فـي نسبنـا نمـارى
بنت الشيوخ اللـى تبيـد السرايـا=وقايـع بشهـود ماهـى هـذارى
مركاضهـم تسيـل منـه الشغايـا=دم حمر مـن رؤس قـوم تثـارى
ومن زارهم كنـه بعيـد الضحايـا=سلـم القبيلـة وورثـوه الـذرارى
روس القبيلة من سليـم انسبايـا=شمال شرقـى الجزيـرة ضـوارى
من نجد شالوا فوق عوص المطايا=بأمر من الفاروق ماهـو اجبـارى
لله غــزوٍ مخلصـيـن النـوايـا=لله وانصـار الشريعـة حــوارى
حنـا حـروب مانظـم الهفـايـا=تاريخنا يمـلأ البحـر والصحـارى
وحنا قمـر ليـل الجزيـرة نقايـا=الىطلـع غابـت نـجـوم درارى
وحنا بهـا شمـس تنيـر النحايـا=وحنا بها زلـزال عنـد الطـوارى
وحنـا بهـا سيـل يطـم البنايـا=إليـا جـرت بالنايبـات الجـوارى
وكـل القبايـل بالجزيـرة قسايـا=هيمان بالهيجا تـدوس الخطـارى
كرام اللحى قاسين ستـر الصبايـا=واليوم صار الرزق منثـر خبـارى
وصارت صحاري نجد مدن وقرايـا=بعد العرى تجـر ثـوب حضـارى
أبفضل حكـام ال سعـود الدهايـا=اللى لها العقبان تمشي حبارى