ليا صار مالك على اللي تكرهه حجه = تجنبه لاتقوم تفند عيوبه
لاتنقل الفارغه وتطير بالعجه =جميع كلمه على الرجال محسوبه
بعض الاوآدم يحب الهرج والصجه= ويردد الهرج واللي يكسب ذنوبه
اشوف شعر ضمير العاقل يمجه = نقص على قايله من علة اسلوبه
من يسمعه يتّهم راعيه با الدجه = بعض العرب منطقه بالشعر عذروبه
الشعر مثل السلاح يصان ويوجه = الصدق هو واجبه والحق ماجوبه
ما هو بللي يحب الهزل والرجه = واللي ليا اقفا رفيقه حش عرقوبه
كم شاعر منطقه با الهاويه زجه =مايدري ان الكرامه منه مسلوبه
واللي مع اهل الولايم يرغب السجه = ويردد اعلوم لو ماهي بمطلوبه
من شان ينشر كلام غير متوجه = والرجل شعره مع اهل العرف مندوبه

صح لسانك
مدخل يشد الانتباه ونصيحة غالية الثمن
ياكثر من ينقل الفوارغ والكلام الفارغ وانا اشهد انك نصحت لكن وين اللي يستوعب
وخلني اتناولها من زاوية ثانية (( مايلفظ من قول الا لديه رقيب عتيد
نصيحة ثمينة والتقاطة لمعنى يخفى على الكثير من الناس
صدقت ايها الشاعر الجزل الشعر دليل عقل قايلة
هذا عند مثلك وشرواك من الرجال المحسوبين مثال يحتذى به للشعراء الشباب
ياكثرهم بها الزمان
صح لسانك ايَّها الشاعر الجزل اهيت نصايح ثمينة وعالجت جراحا غايرة بجسد الساحة
فلله درك ولافظ فوك