ملتقى قبيلة حرب الرسمي - مساجله مع الشاعر الكبير لافي بن نفجان الشعبي الحربي

(سعدالمحمدي)

غزاي جعل ايام عمرك طويله
اسلم وسلم لي على مذرب الشور

لافي ولد نفجان راع الجزيله
والماقف اللي يابيض الوجه مخبور

سجل له التاريخ سيره نبيله
بفرك الخشوم وبيرق الحرب منشور

ياحي راس العود ياحي جيله
اهل المواقف لانثبر كل مثبور

عصمان الارياء والسيوف الصقيله
الحي جعله دايم الدوم بسرور

واللي رحل في جاه منشي مخيله
يحشر مع الابرار والذنب مغفور

يالافي الشعبي زبون الثقيله
البرق شام وسيل وبله على الغور

سيله يابو نواف جنب مسيله
ارضه وخام وماشرب منه عصفور

وانا رجل مقبل على النفس ميله
ولكل عله بالمجالين دكتور

ان ولع الصوان خشم الفتيله
ماهمني بالوقت ناصر ومنصور

من ينقص المكيال مردود كيله
لو قام يلعبها هجيني ومشقور

يخالطين الهيل بالزنجبيله
من فضلكم لاياصل العلم محضور

لاصار مارجال عقله دليله
يضيع لو يمشي على عالي النور

**********************************

رد الشاعر الكبير لافي بن نفجان الحربي

لاهنت ياراعي الفعول الجميله
لك التحيه يابو تركي ومشكور

مقدام مابك ياابيض الوجه حيله
رمحك يرج الخصم مع مشة الزور

سطام لطام النفوس العليله
وجراح لقلوب ِ بها خبث وغرور

شجاع يرهب بالتحدي صهيله
بمصقلٍ في كف ماقف لها دور

حرب الحرايب والصفات الاصيله
تاريخهم في قمة المجد مشهور

ولاقول قول ٍ لين تثبت دليله
ونقدر الاخيار ونحرم الزور

نشوم للعليا بعزم وفضيله
لنا شرف واحساس وادراك وشعور

وماكل برقٍ يالسنافي تخيله
وان ثارت الهيجا لنا ثقل وحضور

من لااعترضنا مانعارض سبيله
واقول للي هزه الغلب معذور

والناس كلِ دون حقه بحيله
وكل ابلجٍ من دون عاليه منعور

ترى القبايل كلها من فصيله
ومن قال انا مسطور ياتيه مسطور

واليوم صار الشعب كله قبيله
بقيادة ال سعود وابليس محشور