يامكثر الأصحاب في وقت السعه=اعدادهم دايم وهي فيها ازدياد
صاحب قديم يجيب صاحب يتبعه=وكلاً(ن) يقول ان الصداقه اجتهاد
تحتار من تختار او من تسمعه=والوقت مايعطي للازمك المراد
واليا حصل لازمك وجات الموجعه=الكل مايسمع تقول انه جماد
واذا بغيت اللعب قالوا اربعه= تشوف صن وحكم وتقلب لك مزاد
وان جيت تطلب لازمك للمنفعه=الكل يوخر عنك مافيه اعتماد
يصفى من الألفين رقم(ن) تطبعه=وصفاره اللي تتبعه صفراً وكاد
تروح مثل الماء بمنخل تجمعه=او مثل قمح(ن) يابس(ن) بعد الحصاد
لكن قولي ذا خذه ثم رجعه =بعض العرب واحد كفو فيه السداد
تلقاه في وقت الشدايد مطمعه=دايم بجنبك ينفعك في كل ماد
والصاحب اللي مايفيدك امنعه=مادام ماياقف في وقت الأرتداد
لكن صديقك افحصه ثم ودعه=ان كان ماينفعك في وقت المفاد
ماتنفع الصحبه وهي ملمعه=ولاتدفي البردان في وقت البراد
ودايم قرارك بختيار طلعه=خلك حكيم(ن) دايماً وركد ركاد
ترى الصداقه ماهي ضحك وطرطعه=ولا هي بكثر(ن) يشبه اعداد الجراد
هذي نصيحة قاف وانا ابدعه=وانت بكيفك وتبع ادروب الرشاد

انشهد انك يالزغيبي على الطيب=جبت العلوم الطيبه والعفيفه
راعي وفاء عديت قافك بترتيب=يصعب على الشعار تعمل وصيفه
من طيب اصلك دايماً وانته مصيب=ترقاء سماء ماتلتفت للمهيفه
جبت الصراحه واضحه للمعازيب=خصيت من جاب العلوم الطريفه
نزهة خلق الله عن الشك والريب=جبت العلوم الصافيه والشريفه
ربعاً لهم مقدار لاشك ميعيب=والحق كيف وكلاً ابخص بكيفه
ذيباً ولك هيبت كبار المخاليب= ترجف قلوب المرجفه والضعيفه
والحق سم ويعطب الزيف تعطيب=جاب الطيور اللي ترفرف رفيفه
تبي تحاول لكن الزايف يخيب=وقام يتخبط صايبته الشعيفه
هو مجتهد لكن على ويش ياشيب=هرجه يصفصفها يبيها صفيفه
يرمي كلاماً مثل نقب النواقيب=يبي ينتف له علوماً نتيفه
وحذر تجاري من مشى سكة العيب=مالك ومال اهل العقول الخفيفه
ودعي لربك كل مرضاناً يطيب=والضيف لو يخطي تجاوزه ضيفه
وانته اديب ووجه العلم لاديب=عفيف ودروبك دروب عفيفه
وللي نوى الفتنه ويسعى لتخريب=لاتحالفه وضن منته حليفه
هذا طلبنا ولاتخيب المطاليب=دام الشريعه في امام وخليفه

السلام عليكم ورحمة الله وبركاته

؟
؟
؟

محاوله تعبر عن نفسها

؟
؟

اتمنى ان تحوز على رضاكم

قولوا امين ولدعاء لازم امين=يغفر لنا زلاتنا اللي نعبده

وتقبلوا اجمل التحايا