الله من قلب ٍ حدوه الملاقيف=اللي ليا سمعوا كلام هرجوبه
حداد الألسن مقبلين ومناكيف=وليا لقوا علم ٍ يقين قدحوبه
عيادهم تفريق جمع المواليف=يالله عساهم للفناء والعقوبه
أعوان أخو مرّه بنوك السواليف=ومزبرقين الهرج نوبه ونوبه
يجيك واحدهم لسانه كما السيف=وإلا الثمن زايد عنه سمل ثوبه
يالله عسى فيهم تحل الصواديف=وإلا تلحقهم من الناس حوبه
للطمس والتغيير معهم تعاريف=والزور والبهتان مابه صعوبه
مذهبهم الزايد يجي فيه تطفيف=تداوروه بطبعهم وإجنحوبه
مابين تدليس المعالم وتزييف=حتى يجيك بغير شكله وثوبه
تلقى لهم بين المهازل محاريف=ونفوسهم عن كل حق مهزوبه
على الحسد والحقد دايم مزاهيف=وأصغر خطى لاحصلوه إفرحوبه
ذولا المرض ذولا العلل يالعواريف=بأسبابهم كم فيه روس معصوبه
داهم يبي يكسر علينا المجاديف=وتصبح سفينتنا علينا معطوبه
نغرق قبل ترسي المراكب على السيف=حتى الهوى ما أظن تصفي هبوبه