كلمـت بالجـوال مالـي لزومـي =غير السلام ونشـدةٍ عـن حوالـه
رفيـق وابغـى مستجـد العلومـي =والا حلالي ما اختلـط مـع حلالـه
وصك الجهاز وقال ياعيـن نومـي =ما أخذ من النشـاد مبـدا سؤالـه
يابو فهـد ياعـل عمـرك يدومـي =خابرك جـزل ونظرتـك بالجلالـه
ما أنته من اللي يجهلون السلومـي =يازيـد يـاراع الوفـا والجـزالـه
للسين جيـم وللسوالـف حجومـي =واعرف من العنوان معنى الرسالـه
ارسالـةٍ فيهـا عتـاب وهجومـي =عتـاب رفقـه مانعاتـب رزالــه
ما ارسلتها لك يا ابيض الوجه لومي =اللوم عنـدك مـا يقـرب مجالـه
وبحرك ما ينعام بـه لـو نعومـي =مـا كـل سبـاحٍ يعومـه لحالـه
وأن صار فيها يالسنافي خصومـي =دايم عن الهـزلات فيـك انعزالـه
دايـم لجـزلات المواكـر تهومـي =تشفق وتاصل لـو تصعـب منالـه
هـذا وتسلـم ياعشيـر القرومـي =اللي يقال ونعم اليـا جـاء مجالـه

فطرتني ياونيس من عقب صومـي =مـا كنـك الا العيـد ليلـة هلالـه
كنك مقـدم لـي فقـار الردومـي =وسميـت باسـم الله جـلا جلالـه
ان جيت هاذي ضيف والا معزومـي =الشك مـن يمـي مسكـر مجالـه
اقوم واقـف مـا توانـت عزومـي =وبعض اللهب ودي يزيـد اشتعالـه
للـي مثـل ذيـه تـراي مهيومـي =اكشف مدى خصمي وقـو احتمالـه
ياشاعرٍ عن كل هـزل محشومـي =صدّر عقب ركب الرشـا بالمحالـه
ان كان اخو مره حصانه عزومـي =انا حصانـي نـوب تومـي حبالـه
ليته درى باحـداث ليلـي ويومـي =قـدام يعلـن مـا تصـوّر ببـالـه
نادى لخو مـرة وقـال مخدومـي =وفرح به اللي كل ما أوحـاه قالـه
وانا من النـوم اللذيـذ محرومـي =في ليلة ٍ فالي عسى ماهـو فالـه
من سم شقرى ٍ في عروقي يعومي =ما ينحسد مثلـي ويؤسـف لحالـه
وأنته شهر كامل تبيـع وتسومـي =في صاحبك ما سلت عن ما جرى له
ماهي أعذار مخرميـن الخشومـي =اللي تبـي مخـراج لـو بالوكالـة
وحقك مثل عـواد يزهـم ويومـي =لـو اجحـده والا أتجاهـل نـذالـه
حقك وجـب والله غفـورٍ رحومـي =بارك جملك وفـي يدينـك عقالـه
احكم ولا تحكـم علـي الرخومـي =مانـي مـدور بالرخـوم الجمالـه
واليا انتهى حكمك تـراك محكومـي =ياخو ونس ونقـول تحـى العدالـه