(---- برلين ----)
 

#قصيدة

(---- برلين ----)


بقلم / فواز محسن الزويهري الحربي

〰🍃〰🍃🍃〰🍃〰


قال الزويهر بدع الامثال وِلعَه
ولا يحكم الامثال يا كود بيطار

احدٍ يولعها على راس شمعه
واحدٍ كما البركان لا هاجسه ثار

والحرف تال الوقت ما فيه طمعه
سوقه كسد فيدين نفاخة النار

والله لولا الراس ما يسِيب طبعه
إني ماعاد أجر صوتي بالأشعار

طرّا عليّه دار دايم في ربعه
مربع روي من كثر همال الامطار

والما زلال يسير دفاق نبعه
تشوف قاعه لا نظرته بلا اكدار

أنهار تجري والشجر زان طلعه
حفحف جنوب النهر بورود وازهار

من جا لذاك الجو ما ضاق ذرعه
حلو النسيم يجلّي الهم لا كار

هذا الكلام بوسط برلين بدعه
حيث الطيبعة ساحرة كل الأنظار

وإن جيت للعمران متقون صنعه
أبدع مهندسهم في تخطيط الاعمار

غير المباني درب مرسوم فرعه
لكل ماهو دب فوق الثرا و سار

حتى السياكل سيرها فيه بِدعه
وكل حي يوجد فيه باصات وقطار

وأسواق عملاقة بها كل سلعه
أصلي ... ولا يوجد بها غش تجار

وراع المقلد له نظام يردعه
لجل كذا المعروض باختام وشعار

والطب فيها له مكانه وسمعه
هم أفضل أهل الطب في كل الامصار

فالمانيا الاتقان مذهب وصَنعه
في كل شي اتقانهم نال الابهار

وأنا عليه الله شاهد بشرعه
ما جيتها سايح ولا جيت مختار

قلبي دعاني يوم قارب لصدعه
غير اللهود أحس ينشره منشار

أمشي مابين الناس فالجوف ردعه
وللعين دمعٍ من محاجره مدرار

جيت لطبيب القلب محتاج جرعة
وأزيح عن قلبي مكاليب الاقدار

〰〰〰〰🍃〰〰〰

صح الله السانك


قصيدة عانقة السماء بجزالتها وأبداعها

تحياتي لك