يالله يا حلال عقدات وانشاب =ترجع زمانٍ لي مضى من سنيني
ماصابني فيه من المعاذير ما صاب =ولا شلت هم ان الرياح تعتيني
ولا شلت هم وللفرح فيه طلاب=اصحي وانا وراحتي راحتيني
ما ايمع حكي واسي ولا هرج مرتاب= ولا شفت من دنياي شي يشيني
ما كنت اظن الحب باحسب له حساب= وما كنت اظن ان الهموم تهويني
هموم صدري صارت اليوم تنساب =بينٍ وبين وبين بيني وبيني
تبرك على صدري بلا عمد واطانب =وتعمي عيوني والملا شايفيني
يالعن ابوها خلت العقل يرتاب =وضاقت بها الدنيا الوسيعة بعيني
متعددة اسبابها عده اسباب =وصبري لي المنجاه والله معيني
وش جاب زولك يالغضي قول وش جاب = انا وحيد ودنيني ما تبيني
اذا تبينا نكون خلان واحباب = حطي في بالك يالغلا حاجتيني
ما همني رجالٍ طويلين الاشناب = ولا همني تحت العباة الكميني
انا بدويٍ ملعبي راس مرقاب = نوبات اغني ونوب يسمع ونيني
وصقرٍ خويي ومالى بخوه غراب =والبس رخيص وناس تلبس ثميني
ومانى من اللى يلعب العاب والعاب= لا جيت ابلعب لعبتي تعرفيني
مكشوف لعبي مثل عنوان لكتاب =يعني بصراحه وين لعبي و ويني
ودامك فتحتي للتفاكير الابواب= ابي ابوح بفكر دايم يجيني
سهرت ليله والقمر حي ما غاب= وقامت هواجيس الخفوق تغزيني
لا من حضرتي ينقلب ودي عتاب =واقوم ازود كلمتي كلمتيني
ويا زينها لا من رميتي بهالكاب= ثم انتثر شعرك على راحتيتي
من سيل شعر كنه السيل بشعاب =من بين ملسن كنها قمتيني
واصير اشوف منضر ذهول واعجاب=واقوم اصفق في شمالى يميني
ورغم المسافه بين عيني والاهداب = احس كنك ساكنة نن عيني
والا قوام جنن اقراب واغراب = خلا مزايين العرب حايريني
والا رموشٍ كنها اسراب واسراب = سوت حول بأنظار هالناظريني
ولا فادني عن شوفها طب واعشاب = من بعد صح اصبحت من المدينيني
أكبر عليكي كيف اسوي لك حجاب= واصير سالم من عوارض حنيني
وماعاب هزك للخصر فيك ما عاب = لا راق جوك و الطرب تطلبيني
والا حنان بضمتك ذوب رقاب = وخلا خليط اجزائها ذايبيني
ما خاب مدحي فيك بالحق ما خاب = واضح وضوح سهيل للعارفيني
اصبحت انا مغلوب والوصف غلاب=والله قدري بالوصف تغلبيني
حثيت في عين اللى حسد فيكي تراب = ومثله من اللى فيك هم حاسديني
مقدر خلاص الوصف ااحرق لي اعصاب = وانتى بسرع الزعل تعرفيني
ولو شاب شعري والشعر فيك ما شاب = بأحفظ لكي حبي عساكي تبيني