رقه ونعومه وذوق مع زول فتان = تشبه عبير الورد في صبح يومه
غرو(ن) حياوي حيل ولباسه جنان = مثل القمر في طلته مع غيومه
كنه الهوى لا داعب اشجار واغصان = قام يتمايل بالدلع والنعومه
في خطوته يعزف تقاسيم والحان = والعين من عزفه غفت في حلومه
في ريشته يرسم احاسيس والوان = والكل حوله منبهر من رسومه
جماله اللي للملا صار عنوان = مغرور في نفسه ومنهو يلومه
الخد وردي والجفن بالوجه زان = وجهه ملاك وحتى في عز نومه
والا الشفايف توت وانتاج لبنان = من شافها ياناس ضاعت علومه
منهو يناظر مبسمه بين الأوجان = ينسى الخلايق لا حضر في قدومه
كنه ملاك الحسن في هيئة انسان = اليا مشى بخطاه يربك خصومه
من شاف طيفه كنه بجو سكران = من كاس زينه قد تناسى همومه
كنه طيور الحب في رحلة أوطان = تعزف جنون الشوق في كل حومه
مثل البدر لا طل والنور ما بان = نوره يغطي الكون وتسطع نجومه
كنه سفينة حب من دون ربان = تلعب بها الأمواج وتعصف سمومه
يروي فؤادي عشق لا صرت ولهان = واليا تعبت آذوق طعم الأمومه
شعري نظم في طلته قاف وأوزان = وهذا قلمي لا خط شمر كمومه
له بالهوى والحب والشوق ديوان = وأحكام مثلى تتفق مع سلومه
ان باع حب أشخاص ماهو بندمان = واليا شراهم يدبل بسعر سومه
هذي وصايف بنت من نسل غزلان = ومن صادف الغزلان شقق هدومه