.
.
الصحيب الي ما يدرى مواقيف الصحيب
لا بلي بمصيبته ماحدٍ يقف معه

والصحيب الي يعالج وعيا لا يطيب
طببه للسوق واول من يسومه بعه

التجارب خلت الي فهم سيفٍ عطيب
وخلت الجاهل يسمى مع القوم امعه

يا غريب الدار ..ما شفت بالدنيا غريب
ويا مكثرت الحكي .. ياحلو هرج السعه

يا متعب رجلك ارتاح قدام المشيب
ويا كبير العقل .. ما كل لغزٍ ترمعه*

يافهيم الراي .. ما كل شورٍ لك يصيب
وان طرحلك راي لو ما انت باغيه اسمعه

يا مقدر حق الاقراب .. لا تزعل قريب
الخطا بوجيه الاقراب صعب ترقعه

احدٍ يدمح خطيتك ويطفي اللهيب
واحدٍ يضرب خطيتك يمه بربعه

والنصيحه طيبه طاب فال المستجيب
ومن يقدم لك نصيحه يحب المنفعه

الرجال اهل *الوفاء عن وفاها ما تغيب
والمواقف بينت لابسين الاقنعه

صف نيتك وتوكل على الحي الرقيب
ومن يعوث الطين بالماء عسى الله يقلعه

الله الي يستجيب لدعاء العبد المنيب
يا كريم اسئلك حبل الرجاء لا تقطعه


#عبدالله بن عيد الحنيني

.
.