الصدر ضايق والهواجيس جنٌي = مدري وش اللي بالزمان اقترفته
ياخوي في بعض البشر خاب ظني = لاتلومني لاقلت هاذاك عفته
لاشك فيهم شفت شيٍ غبني = لكن ماني قايلٍ ويش شفته
الحر يفهم مايحير ويصني = يكفيك مني وصفي اللي وصفته
واليا افتهمت العلم ردده عني = العلم ينسب لي وانا ماحرفته
في سد وجهي مايجي شك مني = وانا على ميقافي اللي وقفته
اغلق اللازم على صغر سني = واليا مشيت انهي طريقٍ نصفته
ما اخلفت مع ربعي والاصحاب قني = وافي مع الوافي بحلفٍ حلفته
واللي تحيزم بي وصد وجهلني = ماني حزامه وان سفهني حذفته
اللــه يعلم وش عباده تكني = والقدر لا شلت الغطاوي كشفته
راع الحسد والحقد دايم مدني = واليا دحمته بالمواقف عرفته
انا حزام اللي لاجيت امتعني = ايثمن اجنيه الذهب لاصرفته
وترى المراجل ماتجي بالتمني = وانا جنيهي مكسبي ما استلفته
ان جاء نهارٍ به اطبولٍ تدني = ما والله ايخيب الحصان ان عسفته
واليا اعترض راع الخطا والتجني = يستاهل اللي يعكس السير لفته
اما تعدل واصبح الحكم صني = والا بطلقات المدافع قصفته
ماني عقم لاسال وادي دفني = ولاني بسيلٍ كل هافي جرفته
ضلعٍ ومن صفق الهوا مايوني = راسي وقاسي ماحصل فيه عفته
ومهما حصل ياخوي ما احرقت بني = ولافيه غير الله من الناس خفته

سلمت ودمت وصح السانك رائعه بكل ما تعنيه الكلمه
حتى هالقصيده ذهب بارك الله فيك