ملتقى قبيلة حرب الرسمي

ملتقى قبيلة حرب الرسمي (http://www.m-harb.net/vb/index.php)
-   مـــلــتـقى الـــمـحــاورة والــردًيه (http://www.m-harb.net/vb/forumdisplay.php?f=9)
-   -   محاورة موال (http://www.m-harb.net/vb/showthread.php?t=157974)

البيرق 30-06-22 02:15 PM

محاورة موال
 
السلام عليكم ورحمة الله وبركاته

هذي محاورة موال بيني وبين شاعر بمعرف دندون ونعم الرجل

البيرق
الليل يا شعارنا شدوا الحيل
الله يحييكم على البن والهيل
ما فيه مسرى قبل لا يطلع سهيل
واللي تبيه العين تتعب وتلقاه
الليلة الليلة عسى الله يعين ..... لا طارت الرحلة بركابها

دندون
الك البقا ياللي ترحب تهلي
جيتك وخل الليل كله يولي
خلك سما واحذر هبوط المظلي
واللي تبيه العين تتعب وتلقاه

ربك كريم يعين في كل حين ..... رحلتك حدد وشهي اسبابها

البيرق
دندووون جب دينار وأبشر بدينار
وإن جبت معك الزيت لا تقرب النار
لا يا عميلي طب فالسوق وأختار
واللي تبيه العين تتعب وتلقاه
نبغى السوالف مثل داب الدفين ..... دوني ودونك ينقفل بابها

دندون
ابشر بعزك كل شي مهيا
حنا بسوق اختار مما تهيا
نرقى بحضارتنا وادبنا سويا
واللي تبيه العين تتعب وتلقاه
نمشي سوا والله يعز الدين ..... بعض العرب لاتفقد اعصابها

البيرق
يا صاحبي دندون وشبك علامك
يا شاعر تفرض علينا إحترامك
وين أنت كمل يالسنافي كلامك
واللي تبيه العين تتعب وتلقاه
الوقت خلى كل قاسي يلين. .... حتى رجال تفتل أشنابها

دندون
انا معك ماصار لي شي ياخي
لا لا يغرك في بعض التراخي
عندي ضيوف عيال عم وبناخي
واللي تبيه العين تتعب وتلقاه
اصبر ترا ربك يعين الصابرين ..... لا تلتفت للناس واللي صابها


البيرق
أنا أشهد إنك كفو ياطيب الساس
قرناس من قرناس والجد قرناس
مثل الذهب يوم أكثر العالم نحاس
واللي تبيه العين تتعب وتلقاه
حنا على وضح النقا يافطين ..... كم واحد شلفاه ذكى بها


دندون
الظاهر انا يالسنافي تواما
من مصدرن راقي وعالي مقاما
بدون لا تبدي علينا الكلاما
واللي تبيه العين تتعب وتلقاه
يستاهل التكريم راع الزين ..... كم واحد يتعب ولا جابها


البيرق
هذا عشمنا في الرجال الطحاطيح
أهل الكرم والجود بالفطر الفيح
من دونها تقصر علوم المشافيح
واللي تبيه العين تتعب وتلقاه
يستاهل الوافين سمن وسمين ..... سقم العدا فكاكة أنشابها


إنتهت المحاورة وتدخل أحد الأخوه اسمه نار البحر

نار البحر
يارافعن صوتك ترانا سمعناك
وايضا فهمنا ويش تقصد بمعناك
تبني ولكنّا هدمناه مبناك
واللي تبيه العين تتعب وتلقاه
السن بالسن وايضا العين بالعين ..... احكام دين لزوم ترضى بها

*
رديت عليه
حنا نعرف إن البحر موطن القرش
لو في البحر نيران ما ياصل الطرش
واللي يجيب العايمه ينكرش كرش
واللي تبيه العين تتعب وتلقاه

ياعين فالترحيل لا تذرفين
يا ما حلى دلهي وبنجابها

.....................

حسيـن 23-07-22 01:54 PM

صحت السنتكم
محاورة جميلة

الحب الباقي 13-08-22 09:23 AM


صحت السنتكم
والله يـعـطـيـكم الـعـافيـــــــــــة
بيض الله وجيهكم



الساعة الآن 08:54 AM

Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir

Ads Management Version 3.0.1 by Saeed Al-Atwi