البارحه وهموم قلبي ملايين= اثقل علي الليل من ضلع قاره
همي سرابي في جميع الميادين= ياليل ياليل العنا والقشاره
فرحت يوم اذن جميع المواذين= من الفرح عدي اضم المناره
النار شبت في خفوقي براكين= واحرقت من جمرة ضلوعي سيجاره
كنيتها بالجوف عبر الشرايين = ونفثتها والدمع زاد انحداره
ومن ازرقه يرسم على الجو خطين = خطٍ يمين وثانيٍ في يساره
آه 00 ياخطٍ مسكته على وين! = والله مدري وين وجه مساره؟
اشوف حرف النون وانطق بها سين = مجهول حرف السين هذا اعتباره
والراء بين حروف تدمع لها العين = اهاات ارددها ودمعي شعاره
وعديتها للياء ولعلها تبين= ورجعتها لنون والعلم شاره
ولملمت انا احروفي وناديت (؟؟)= ياسمٍ عشقته وين وجهة دياره
مدري انا وش صار ماادري الى الحين= يامن فقدته بين لحظه وتاره
ايام هذا الوقت اصبح لي سنين = من دونها ايام عمري خساره
بنات حواء شفت اكثر من الفين = واضف لهن زينب ونجوى وساره
والله مايسون من الارض شبرين = اللي تاطاه الزين وبرضه اثاره
مع احترامي للعذارى مزايين = مايلااام خفاقٍ عزفتن وتااره
ياالله ياوالي ترجع لي الزين = ويامبشري والله لسوق البشاره!!!