ملتقى قبيلة حرب الرسمي - هات العلوم اللي تفرّح

عيني تناظر فالسّما والسّما مابه نجوم
يوم الفضا صافي وعنّا مايحجبها غمام
وياطير ياللي فالسّما نَرَقبَك وانته تحوم
تعال يمّ الأرض وابشر لك بشُرب وطعام
ليّه غرض في جيّتك وانت فاللازم تقوم
سوّي مثل هُدّهُد سليمان لو فاقك مقام
هات العلوم اللي تفرّح وخذ منّي علوم
واقري على اللي طوّلت غيبته عذب السّلام
واشرح له الأوضاع لاارتحت من بعد القدوم
وصّلّه اللي قلت لك لاتزوّد فالكلام
صُمنا عن اللي ماحسبنا عنه لحظه نصوم
والطّرف مشقيني مشفّق على لذّ المنام
والأُنس والكشتات ماعاد لي فيها لزوم
اشوفها حِرمت عليّه ولو ماهي حرام
كم عشت لي لحظات حلوَه واحسّبها تدوم
لكنّ طفّت شمعتي صرت ساري فالظّلام
عدّت ظروف اتحالفت وأصبحت ضِدّي خصوم
ياليت لي قُدره عليها نهار الاحتدام
وأصبحت فيها رابط الجأش مارحت امهزوم
لجل الشّموخ وعزّتي مورثي ليّه وسام
ويوم أنّ بعض النّاس يبغى على الفزعه رسوم
ماهو محصّلّه مدايح مع النّاس الكِرام
ماني مدوّر فزعته والرّدي عنّه نشوم
هذا جوابي وانتهى والسّلام أجمل خِتام

الشّاعر/ خالد بن عبيد بن معتوق الأحمدي