|
عهدٍ علي اليوم وبكره وبعده
ابقى طول العمر قوي العزيمه ايمان بالمعبود والخير عنده عهدٍ عليه ماانحني للهزيمه عزمي قوي وابليس مهزوم جنده حكاية الحساد حكايه قديمه قلبٍ ملاه الحسد يغليه حسده لين يرمد وسط الحطب والهشيمه صبرك على من يحسدك نار كبده يجعل بجوفه عاهةٍ مستديمه ويالآدمي دنياك لاشك نكده موقع سعادتها مواقيع غيمه هذي احكام الشعر واختار وحده لك عندنا ياصافي القلب قيمه نجم حرب |
يالعاقل هم الناس ماذا يقولون
قالوا كثيرٍ والسوالف طويله الناس كل الناس بالناس يحكون وكلٍ يحدد كلمته مع زميله احدٍ يقول الحق وابليس ملعون يازن كلامه ماحصل منه ميله واحدٍ هو راس ابليس آذان وقرون وفرعون عمه والخميني عميله الله امر ناسه من ناسه يعوذون حتى النبي رب الخلايق دخيله تلقى الوفي وراه ناسٍ يحسدون اما الغبطه والا النفوس الغليله وتلقى الردي وراه ناسٍ يهرجون تفضفض مجالسهم ومامن حصيله هذي اطباع الناس والناس يدرون ماعاد للعاقل على الناس حيله ويالعاقل المذكور سلام مليون اجلس معي والكل عقله دليله نجم حرب |
الناس من كثر المهاييط ملت
وانا من شوف اهل المهاييط مليت لو محكمة ضد الهياط استقلت كان استقلوا ربعنا واستقليت ياشجرةٍ فيها العقول استظلت في ظلها ياهل العقول استظليت لوكان جيوش الوقت لي استحلت انا بجيوش الصبر جيت استحليت ياكم ناسٍ حيل للكبد علت وياكم انا لكبودهم حيل عليت سقت الركايب لين بالعشب فلت وانا انبسطت وللحجاجين فليت ركايب العدوان قفت وولت وانا على عرش المعزه توليت نجم حرب |
هدية للشاعر/ محمد بن عبدالله السليمي / ابو زايد
يامحمد لاذكرت زحول الرجاجيل انااشهد انك صرت ضمن الاوايل ماكنك الا ثالث الجدي وسهيل والا القمر نقول هو البدايل يابو زايد الطيب ماهو ورى النيل الطيب طيبك ياعريب السلايل الوضع طيب والدعاوي تساهيل بظل السعود مطوعت كل عايل ياالله بغيثٍ فوق داري هماليل وادي الرمه يصبح من الوسم سايل والكل ياخذ مع رفيقه تعاليل في خايعٍ والعشب فوق النثايل دن الدلال وكثر البن والهيل فل الحجاج وهات بدع الجزايل نبعد عن اللي ماوراهم محاصيل اهل القلوب المغرضه والعلايل اسبر طريق الليل ياساري الليل حتى تشوف اللي عن الدرب مايل وتم الكلام اللي على خاطري قيل وكل الامور سهود والشك زايل مع تحيات / نجم حرب |
سألت قلبي والمشاعر وكلي
راع الهوى هو ليه مغلوب بامره وجاني جوابي من سموي فداًلي ان الهوى والحب باسباب نظره وقعت لنفسي واقعي من سجلي والنص بالتوقيع مفقود صبره وسألت غيري قلت بس استدلي عن حالة العشاق في كل سهره كلٍ يقول ارجوك يامى حصلي يامى على المجمول هليت عبره وفهمت ان الموضوع ناتج محلي الحب نظره واول الغيث قطره انا رهين الحب من حب خلي يامى على شانه تجرعت حسره اضحك لاعداي وخاطري مسفهلي والقلب كنه داخلي فوق جمره حسبي على اللي للضمير استحلي عقب المحبه كاوي القلب هجره ليته على شان المحبه يطلي او يعتذر لي واقبل اليوم عذره نجم حرب نايف عبدالله السليمي |
عليك يامحمد من اوصاف اخو نوره ذاك
يمكن على شان انه جدك وسلمان ابوك ماهي غريبه تشبه جدك وتشبه اباك وماهي غريبه قولت جدك وابوك اسبقوك انا اشهد ان الولي من وصف جدك عطاك وانا اشهد ان البشر من وصف جدك عطوك الا ياحرٍ كفخ مااحدٍ يجاري مداك والحر له عادةٍ بالجول ساطي فتوك سلام ياسيدي الشعب كله فداك وزوداً على شعبك الوافي العالم فدوك وسلام ياسيدي الشعب كله وراك لاقلت انا خيَّلا العوجاء ترى الكل جوك وسلام ياسيدي حمى الوطن هو حماك قول وفعل ياولي العهد مابه شكوك حقك علينا ياسيدي انجدد ولاك والكل منا معه للعهد عقد وصكوك ومن لايصون العهد لاشك خان وعصاك سل الحدب ياطويل العمر للي عصوك وتمت ابياتي العشره فيك والله معاك اشوفها عندي اغلا من عملات البنوك نجم حرب نايف عبدالله السليمي |
الساعة الآن 08:03 PM |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir