عاين سماك وعاين الارض حولك = تلقى الخراب اللي بأروبا نسويه
وان طعتني حاول تعدًد فعولك = مير استر الموضوع لاعاد تطريه
نفعل ونفعل مثل ذولا وذولك = هذا الصحيح اللي عن الناس نخفيه
حتى امام المسجد اللي حكولك = علمه وصلني وزاد قلبي مآسيه
خل المظاهر يامقصًر بطولك = ماهي طواعه يوم راسك تدربيه
ياذا الزمن ياشين عرضك وطولك = عم الفساد وخاين الناس نوحيه
مير النصايح ياصحيبي حلولك = لامن غدى قلبك يعدًد معاصيه
اصحى تطاوع شهوتك مع ميولك = والنفس منهو طاعها ماتراضيه
خاف الله اكثر من عوايد اصولك = خل الحيا والعيب وخوف المشاريه
اركان دينك مثل بيتن بنولك = عامودها لو طاح ماعاد تبنيه
واقرى كتاب الله واكثر بقولك = استغفرك من كل ذنبن نقع فيه
وامك وابوك هم سبايب دخولك = في جنة اللي ميًت الروح يحييه
ادعي لهم مادامهم قد دعولك = والبرً فيهم في عيالك تلاقيه
ياصاحبي والناس لو اضحكولك = عند اللسان اللي كثيره بلاويه
اذكر كلام الله واذكر رسولك = بالنار تهوي كم خريفن وتقضيه
واقضي ديونك كلً ماهم صفولك = وقتك ترى محدن ضمن ويش تاليه
من عبت زوله ظنًتي عاب زولك = وهرج القفى منهو يجيبه يوديه
والناس لو يشكو عليك او شكولك = من يظلم الشاكين ربي يجازيه
لامن عطيت الحقً ثم اشهدولك = ترضي جميع الناس واللي تعاديه
من عقبها كل البشر صفقولك = وتضحك سنون اللي به الهم صاليه
ياقاف كف يوم زانت طبولك = يجزاك خيرٍ يوم همي تسليه