يازياد بالدنيا بعيده أشبوحي=ماني من اللي نظرته عند ماطاه
نفسي لفعل الطيب دايم طموحي=ودرب الردى من صغرنا مامشيناه
بالدين والاخلاق هذبت روحي=ونبينا المختار نهجه نهجناه
قلبي لصافين النوايا نصوحي=يوم ان بعض الناس سودٍ نواياه
من الحسد والحقد قلبه يفوحي= فوح الدلال اللي علي الجمر مركاه
لسرار خلق الله دايم فضوحي=اليا سمع في علم جابه ووداه
ضاري على نبش الفتن والجروحي=ماله مع الاجواد حسنه بدنياه
نفسه على هرج النميمه جموحي=بالمجتمع عسى قليله حلاياه
مع العرب مثل السروق المزوحي=يالله لاتبلا الاجاويد بالواه

عن شرهة العاقل وذم الرديين=وقولة قدى والاعلى غير قادي
صديت عن بعض العلوم الملاوين=علوم للعاقل تعل الفوادي
تناقلوها حاسدين وبغيضين=ماعندهم من علم غير الدوادي
وانا رجل طبعي مع العسر واللين=ماحب في بعض العلوم التمادي
ماهمني هرج الردي والمساكين=رجال عندي عز نفس ومبادي
ان جاتني عوجا بعيد وقريبين = عنها الفجوج اوساع وسط البلادي
لاصار مالي عندهم خابرٍدين=الصمت حكمه عن كلام السرادي
لو كل مسمع ثارني يالفهيمين= شرهة علي الناس حضر وبوادي
العام قدنا معركة بدر وحنين=وعن الحما رديت كل الاعادي
رجحة بالميدان كل الموازين= السيف سيفي والكحيله جوادي
ولقيت ضدي ناس وسط الفريقين= تلومني وتقول مخطي وغادي
لاخذة في راي الرجال الحكيمين=مابحث عن الاخبار في كل رادي

يمناك يا راس الوفاء والمروه = على الفرايد لا عدمناك يمناك
نادر حرار لك مع الطيب خوه = ساسك قرانيس النوادر ومجناك
ماهي غريبه يا عقيد الحموه = بالوقعتين وغيرها حامي حماك
بياض وجه وفعل ما هوب توه = فارس ولك ميدان وشهودك عداك
حرب العريقه يا سعدها اتنوه = ابمواقفك يالحر والمدح يزهاك
سيفك سعد عين وسقم عين سوه = على العداء دون الحما لا عدمناك
نجمك سماوي كلما شع ضوه= لهد رخوم قاصرين (ن) عن خطاك
يا ريف ربعه يا مجزي عدوه = عن الكرى ومتوب الضد طرياك

ياتركي العوفي كبير الحموه= حياك ياريف المشاكيل حياك
مالاح براق الحيا وسط نوه=وماسارت الاقلام في وسط الابواك
من طيب راسك في كلامك منوه=عني عسى رب المخاليق ياقاك
من وقت يامكثر على الناس سوه=يدور دورات المحاله والافلاك
زاد المنازع فيه بعد الاخوه=العنبر الاصلي حصدناه تنباك
من بعد هذا يالشجاع المفوه=من قام منا سد مثلك وشرواك
فينا على راع الخطايا فتوه=لاقام حربي سد ذولا وذولاك
ياعل يفدى كل طيب مشوه=اليا نصحته قام يزمر ويشناك
متقلبٍ دايم مزاجه وجوه= لو انت عنه ابعد من الجدي يبلاك

بين الصواب وبين عكس الاتجاه =
=انا لقيـت التبـع مثلـه يتبعـه
وشد انتباهي سلك من كم العباه =
=ماجود بدون الخمس فوق الاربعه
حوله من الواعين ريبه وشتبـاه =
=سمعت بالموضوع غلطة مطبعه
حبر القلم لونين في جنب الصفاه =
=ماقول شوف العين نسمع قربعه
يقوله اللي يعرف البير وغطـاه =
=فطين مايعمي عيونـه بصبعـه
فصيح ماينشب لسانه في جمـاه =
=يوجع بطعناته وضيفـه يشبعـه
تم الكلام ومن يـدور لـه لقـاه =
=من شاعرٍ جاب الخبر من منبعه

بالديره اللي ياعسى مجنونهـا يرجـع وراه =
=والوضع ماهو يالبناخي راس ضب وجربعـه
الدار فيها حل شيـخٍ ياخـذ الحـق وعطـاه =
=يصد عن هرجة كبير النفـس راع البعبعـه
ماجبت علم البارق اللي لاح من فوق الحصاه =
=جنوب وانت تخيل براقـه شمـال الاصبعـه
لوكل من يرمي يابن عمي يعد مـن الرمـاه =
=تلقـى الديارامـا دهـر ولا الديـار مربعـه
الحق يرضي والرفيق الحر مانشقـر عصـاه =
=أصير دونه عن شعاع الشمس ثوب وقبعـه
دايم نحاول يالبناخي بالزمن نكسـب رضـاه =
=وان شاف راسه فوق روس القوم والله لجبعه
قال المثل ياصاحبي مال السلامـه والغنـاه =
=راع الطبيعـه مايخليهـا يـالـو اطبـعـه

علوم ماودنا فيها عليها أنجبرت =أجبرني اللي حصانه للخطاء مسرجي
اليا نشدني بردي للغشيم أختصرت= عساني اللقاء عن علوم الردى مخرجي
كرر سواله ثلاث أمرار حتى انفجرت= قلت اسمع السالفه ياحضرت العربجي
راع العباه العريه لو داعاني حضرت=لكن من دون داعي كيف تبغى نجي
نفسي عزيزه بها صوب المعالي شهرت =ياخالط الورد والريحان بالعرفجي
كبرت في عين شيخك هن والا صغرت=ماغيرت نظرته من قدري ومنهجي
بفعولي الساميه بعيون ربعي كبرت= محشوم بين الجميع الاوس والخزرجي

زبن الحنيني عريب الجد والخالي=على الوفاء والرجوله شامخٍ راسه
شيخٍ ولد شيخ ماهو حي رجالي=راعي قديمه وراعي جاه وسياسه
ماقدمه بين ربعه كثر الاموالي=مقدمه مع جميع الناس نوماسه
عليه مايمشي الحيلات محتالي=وراع الخطاء والتغطرس يكتم انفاسه
مايقبل المخطيه في كل الاحوالي=وعن الردى والخطاء يابعد مرواسه
صعب القضايا لها بالحال حلالي=بشت الشرف والرجوله دايم أقياسه
يستاهل العود الازرق طيب الفالي=وبيضاء تسجل بتاريخه وكراسه
مقدام قومٍ لهم بالطيب منزالي=ماهي سواليف خايب قالب الطاسه
ياما كسرو من عقيد وكم خيالي= وجابو حراير عليها سبر وحراسه
يردون حوض المنايا يوم الاهوالي=من فعلهم كم شيخٍ يعلن افلاسه
قدام بالحق الابلج يذن بلالي=في نجد ساده واهل نوماس وفراسه
أهل زعامه وشيمه بأول وتالي=والنعم فيهم عدد ماهب نسناسه
الطيب ماهو هياط وبشت وعقالي=الطيب ماضي وحاضر تنعرف ناسه