من المدينه يافهد خاطري ضاق = والله مادري وين اوجه واروحي
مليت من شوف الكباري والانفاق = ومليت من ماشوف باللعين واوحي
لاوهني سلطان يدله بالاسواق = وانا جريح و من يداوي جروحي
اخيل لي في يمة الشرق براق = ياتل قلبي يوم شفته يلوحي
لاوالله الا دق بالقلب دقاق = وهيض الروابع وسط صدري يفوحي
وسط الضماير ولعت نار الاشواق = وعن ماتريد النفس قصرت شبوحي
بيحت ماكنيت في وسط الاعماق = ولاودي اطول عليك الشروحي
قالولي انك للتماثيل عشاق = تارد على الجمه وزندك يموحي
قلت الفهد ماجيه غره ومدراق = من جرب الغامض يحب الوضوحي
اللي زعل في وقت تشقيق الاوراق = في ذمتي ذاك الصدوق النصوحي
قد جرب الدنيا على كل الاذواق = ليا طعت توجيهه بنيت الصروحي
ورضاه يفتحلك وسيعات الافاق = وبرضاه ترقأ عاليا ت السفوحي
سكر سموعك عن وسيعين الاشداق = من عاشرالجهال سده يبوحي
الطيب من بين الرجاجيل مزراق = وتكثر خطايا مكثرين المزوحي
ماباس ياشاكي من الوقت الارهاق = ومن الضيق جاوب كل ورقأ تنوحي
هجرس ضميره والقوافي لها ساق = واحترت انا والخال ماهو لحوحي
من ضيقته محتار والقلب محراق = تايه بليل امشي وراء كل ضوحي
لو ان بسطك ينشرى ندفع الطاق = فيما املكه ماني عليكم شحوحي
ونجدٍ نحبه ولهوى نجد نشتاق = خصٍ ليا قامت بروقه تلوحي
حيث انها مرتع طويلات الاعناق = اللي بهن يلقأ غبوق وصبوحي
ياما حصل من دونهن يبس الارياق = بمصقلاتٍ للجماهي تزوحي
كم شيخٍ قومٍ دونهن طاح وانعاق = ضفرن لدكلات السبايا نطوحي
ودنياك كم رجلٍ من امرارها ذاق = وانته بها خلك حليم ودموحي
وتداعي الوجدان جتلي بالاوفاق = وفيما امتلك من كنز هنيت روحي
كنزي صناديد النشاما ليا تاق = خطو العنيد اللي حصانه جموحي
ليا التووله ياخذ سنين مافاق = عقب الفراسه صار ثعلب ضبوحي
يابو بدر دايم للامجاد سباق = ونصحك وتوجيهك يحقق طموحي
واللي زعل له غامض الوضع مالاق = واوصى عن الكلب العقور النبوحي
قال انتبه وافطن ترى الوقت بواق = واحتاط من خطو الهبود الطفوحي
وقلت اعتصم با لله جلاب الارزاق = بعيد عن هالنوع فكري وشوحي
يخطيك شر الباس والخال فراق = وحي الجواب الذوب هيض القروحي
سهيل نوره بين الانوار شعاق = بين الكواكب ضو نوره فضوحي
شاعر رهيف احساس حبال تفاق = فتال نقاضٍ لسانه فصوحي
كثرالظنون هيام والظن فتاق = ماودنا سرحك يفاخت سروحي
ومن يدري الدنيا بها جمع وفراق = اما سعت بالبعد والا الضروحي
موج البحر لهاج يغرقني اغراق = واليا ركد موجه قدرت السبوحي
بديت من حبيت عن قرب الاعماق = وياسرع مادورت عنه النزوحي
ضلعٍ زماء مع جرد غمقات الاشناق = وذراه مايذريك لفح اللفوحي
قطعة وصل رجلٍ على وصله شفاق = ومن دون وصله صادفني سموحي
خقي عليه البيض مبدأ ومغلاق = واختار عنها خاب ظني جنوحي
اللي تركني بين فيه ومشراق = ياحيف صدق بي كلام السلوحي
كذب وصدق قول كذاب ملاق = والمغلقات استرسلن للفتوحي
امسيت طيرٍ منكسر فيه مسباق = لو هام للجه مداه السطوحي
لاوالذي بالكون عالم وخلاق = تذهب حسناتي وتكتب بلوحي
ماجاه غير الصدق من راس مصداق = وحطمت رايات الطرب والفروحي
مابيننا ماطرقه كف طراق = سيف النمايم من يمينه ذبوحي
عز الخطأ من صارله سد ورواق = وانا احسبه صاحي وفكره لموحي
الموت فجعه والعزاء سيف شلاق = طاح القناع وبان وجهن قبوحي
احدٍ تجرع بالعزاء سم ترياق = جداه دمعٍ فوق خده سفوحي
صابر وقلبه ينمزع من معلاق = وميزان راع الصبر دايم رجوحي
راع القصايد له عن العز مدناق = بعد المعزه عن عشاش الجلوحي
ماظن تجهلهن جديدات وعتاق = رجلٍ على الادنين زنده قدوحي
الجزل من تبريرها هزل ودقاق = انا نظر عيني للدربي بروحي
خله يولي عقبها بالف طقاق = اصفح بحال وحال ماني صفوحي
ثوبٍ ستر من بان في جسمه بهاق = يرفاه لاتظهر خفاه الشلوحي
تفرح بها ناسٍ لهم عدة ارناق = وكلٍ يبي منها رسوب ونجوحي
نار الحسد والحقد تحرقهم احراق = شف كل ماعونٍ بما به نضوحي
وحلت بعد ضاقت بها سبع الاطباق = على الذي بالكذب يبغى المدوحي
ومن يرفع الهامه على موس حلاق = يمسي صعب والصبح يصبح مسوحي
واليا صرت بين حصان وحمار نهاق = صقلة حصان ولا حمار رموحي