مصدر قرارك فيه بعد النّظر بان=قرار يعكس نظرة انسان واعي
يحسب حساب لواقع ومقبل ازمان=سدّد وقارب لين فيه استطاعي
ترتيب سلّم حكم تقويم سيسان=والله يصونه مايجيه انقطاعي
واعلن به الدّيوان مااحتاج تبيان=يظهر به التّوفيق حسب اطّلاعي
يجمع دهاك بحكمه وطيب واحسان=وتبشر يابو متعب وحكمك مطاعي
وامّبايعة مقرن ولياً لسلمان=واجب على شعبٍ لعزّه يراعي
وآنا مبايعكم من اوّل وللان=واللي حذا حذوي ظفر بانتفاعي
مايموت ميتة جاهليّه ولا ايهان=يكسب معزّه مايجيه الصّراعي
يابو فهد وامّبايعه جاتك اعلان=وماجبتها قصدي نفاق اجتماعي
لاوالله الا حقّ جبته على ارهان=صاين طباعي يوم اقول انطباعي
وابدي ولائي دون لاشاور انسان=واعلن للأل سعود جلّ انصياعـي

( في تويتر غرّدوا )=
الزّمن هذا عجب كل شيٍ به يصير=المبادي قومها كيف منها اتجرّدوا
صار فيه العلم من دون جنحانٍ يطير=اسرع من صقور خلف الحباري طرّدوا
وكل مايحدث حدث من كبير ومن صغير=غرّدوا يامغرّده في تويتر غرّدوا
قالوا انّه لتّواصل ومايخفى خطير=افطنوا للغرب باللي عليكم ورّدوا
من سلالة قوم ساخطهم الله المجير=النّفوس الفاجره خنزروا وتقرّدوا
جولكم بالفيس بوك باب منّه تستثير=الشّعوب الامنه كم جماعه فرّدوا
احتموا لوطانكم ياعرب جاكم نذير=الوطن مايحفظه قوم فيه اتمرّدوا
واغلبوا واقعكم اللي عداكم به كثير=لا تهابوهم ولا تشردوا بل شرَّدوا
ذي نصيحة شاعرٍ غاضه الوضع المرير=فالشّعوب المسلمه حال منه اتشرّدوا
الثّقافه واسعه والعقل فكره كبير=مايطاوع قوم عكس الحقيقه سرّدوا

إذا اتجهنا بالدّعا مع صدقنا فالابتهال=لله حلاّل العقد ماخاب فالله الرّجا
امّة محمد حالها في ميل ماهي فعتدال=واصل السّبب تقصيرنا والوضع جدّاً محرجا
من بعد هيبة صفّها اليوم تحت الاحتلال=التّفرقه في صفّها خلّت عـداها تدرجا
إلى متى نسكت على من يستهينون الرّجال=والنّصر ماهو يكتسـب على هروجٍ تهرجا
لازم نوحّد صفّنا والتفّرقه فيها ضلال=واخيولنا لابدّها يمّ الاعادي تسرجا
والازمه اللي برقها بين الجنوبي والشّمال=بعد اتّكال بربّنا بالعزم لازم تفرجا
سترك ونصرك نطلبه يامرسل الرّيح بخيال=واجعـلّ لنا ياربّنا من كلّ ضيقٍ مخرجا

امة الاسلام ناقوس الخطر=ينسمع واعداك ماهي لك تخيف
عيدي الامجاد في غزوة بدر=اجتماع ايمان بالباس العنيف
غفلة الحكّام مع قصر النّظر=خلّت العدوان من دونك لفيف
ومن يجيب الجور في ربعه كفر=والنّذل معروف ما قلبه نظيف
جرم من بشّار صعبٍ يغتفر=استباح الدّم والعرض الشّريف
ليه نتفاوض معه بعد الغدر=التّفاوض جبن والغادر ضعيف
وماتحلّ الوضع وسطات الغجر=ولايجيب النّصر مجمع في جنيف
والصّبر طوّل ولا تغن النّذر=ومن تغاضا عنه يصبح له وليف
والولايات العدوّه بالعذر=تدعي بالصّلح والواقع سخيف
ترسل المندوب في نقل الخبر=يخفي الاحقاد بالهرج اللطيف
امّة الاسلام نصحي بالحذر=لايزيد الجرح ويزيد النّزيف
مشكلتك اخطارها عبر الاثر=حلّها موجود بالسّيف الرّهيف

ليت الزمان يعود مع ذيك الامجاد=يوم العرب دكّت جيوش الفرنجه
والدين نشره واصلٍ قاصي بلاد=واصل لشعب اسبانبا عبر طنجه
واليوم اشوف الناس من أمّة الضّاد=تنعي حضارتها بلحن الكمنجه
شبابها ماهو على نهج الاجداد=بالوقت هايب من مجوسه وزنجه
والى بدا فيهم غيورٍ وهدّاد=الغرب يضرب له وريده ببنجه
حتى بعضهم صار علّه للاكباد=عايش ترف واضح دلاله وغنجه
كيف الفروسيه عقب طارق زياد=صارت على لنّكن ودبّاب ننجه

على طلب جمهور شجّع لشاعر=ايسرهم في ترجمان المشاعر
والشّاعر المحبوب بالودّ شاعر=( يحفظ لهم تقديرهم طول الا زمان)
ويقول هذا فضل من عند ربّي=اللي جعل من بعد الاعجاب حبَّي
يسكن صدور اللي لحرفي تلبّي=( اشكرك في نعمتك يارب منَّان)
ومن شاعرٍ مرباه بارض الحجازي=شعر المعاني عندنا له مفازي
والّا الهزل مايجلب الاّ التّهازي=( حنّا نصون القاف معنا وبنيان)
من بعدها نبدا بنظم المعاني=تصوير واقعنا من اللي نعاني
اسوقها لنَّاس عنوه بعاني=(مصيوغةٍ بابداع غايه بالاتقان)
نبدابها قول العباره صريحه=منضومةٍ ببيات صنع القريحه
ومن ديننا الاسلام دين النّصيحه=( ايحثّنا للنّصح بآيات رأن )
وياقاري الابيات بعد السَّلامي=ابغاك تحفظها بفهم الكلامي
هذي خلاصه من ثلاثين عامي=( من تجربه والتّجربه خير برهان )
ايقولها خالد بن عبيد واسمع=امثال مثل الماس مغري ويلمع
ماجابها راجي من النّاس مطمع=( يرجو فضل مـن يامر النَّاس بحسان)
البخل عمره ماجلب عزَّ وسرور=راعيه عنده مال ويعيش مقهور
اليا لفاه الضّـيف تلقاه مذعور=( دايم وحاله عابس الوجه طفشان)
والاجودي يوصف بوصف الرّجاله=تلفيه في داره وسمحٍ قباله
يسخى لو انّه مايجمّله ماله=( واهل الكرم من رازق الخلق تنعان )
وما مثله اللي يتّصف بشجاعه=مكارم الاخلاق تلزم طباعه
فيه العفو عنده قبول الشّـفاعه=(وطبع الشّجاع مسـدد بفعل رحمان)
خلّيك مثله دوم يابعد حالي=درب الخطا لاتجيه مابه معالي
وللحق كلمه قولها لاتبالي=(لاتفتكر فالنّاس لو مين ماكان)
موتتك مرّه ماهي بعشر مرّات=جهّز لها طيب الذكر والصلاوات
وان متّ لك جمعه مع اخيار الاموات=(والعمر ماينعاد لوبغلا الاثمان)
عيش الحياه بحلوها واعتبرها=الفانيه لو انّنا نعتمرها
والنّاس جاملها ولاتحتقرها=(نتيجة الحقران تحصل بحقران)
اظهر لهم طيبك وكلّ احترامك=وفصناعة المعروف يعلى مقامك
ولاتخاصم اللي راغبٍ في خصامك=(واحذر تهقوى وان تهقويت غلطان)
والمنّ بالمعروف تفسيد معروف=وحلاوته لاصار ماهو بمكشوف
ولو ينجحد لاتلحقه غيض وحسوف=( دام الجزا ياتيك من ربّ الاكوان)
ليّن جنابك والتّواضع يامحلاه=هذي صفه فالعبد يرضي بها الله
وصدر الحليم ايزيد فالوسع لاجاه=(واحد ضعيف الحال وافعقله اجنان)
واغنم شبابك فالشَباب الفتوَه=وافشبّتك جيب الوفا والمروّه
ولازم يجيك الضّعف من بعد قوّه=( قمّة كمال الشّي تخلف بنقصان)
لاتنطق الا قول فيه اللطافه=واضحك ومازح بالادب والثَّقافه
وايّاك والتَّجريح والاَّ اللقافه=(اثنينها للمرء تاتي بخسران)
واجلس مع اللي ماينقص جليسه=في مجلسٍ فيه العلوم النّفيسه
وخلّك ثقيل ان قلت قولٍ تقيسه=( والثّرثره ماهي لمن صان الاقنان)
واعرف ترى الشّجعان تنصف بعضها=( تذكر مناقبها لو تكون عدوان)
واليّا عشقت لزوم تصدق بعشقك=خلّ الذي حبّيت يوثق بصدقك
حافظ عليه احفاظ جيبك لرزّقك=(وانهاك عن دربٍ به الحيف عنوان)
وان شفت من حبّيت يبدي صدوده=لاتتبعه تجرحك قسوة ردوده
والرجل تظهر هيبته في ركوده=(مايظهر اشواقه لو يكون شفقان)
ومن لا يريدك نقص كانك تريده=يبغى يكيدك وانت ثقلك يكيده
تراه لوّ عوّد يعوّد يعيده=(وايزيد تعذيبك الا صرت عشقان)
واحذر تبدّل لامر دينك بدنياك=لو كان هذا الامر فالفتنه اغراك
تراه مايغنيك لو يظهر اغناك=(وان طالت اعزوبيّتك عشت حزنان)
والرّزق لاتسعى تجيبه محـرَّم=من شان ماتصبح بفعلك مغرَّم
واللي محلَّ الرَّزق يبقى مكرَّم=( وحضّ القنوع بعزته رفعة الشّان)
وايَّاك والشّينات لو عشت بالجوع=خلَّك نظامي هاجر لكلّ ممنوع
وماتعمله فالنَّاس لابد مرجوع=(كلّ السّوايا دين والرّب ديّان)
واحسب حساب لكل قولٍ تقوله=ولاتقول قولٍ بالفعل ماتطوله
واللي يحب الله يتبع رسوله=(يعمل بهديَّه لاحضر كل ميدان )
والوقت لو هو فايرٍ منه دمّك=لاتحسب ان الله يكفيك همَّك
إلا انكسبت ارضاه فآبوك وامَّك=(يضفي عليك الخير مع جلي الاحزان)
ولمّ الشمل يحصل بوصل القرابه=في قربهم تصنع لنفسك مهابه
ادمح خطاهم لاتجيب المعابه=(شقر العصى يفرح بها كلّ خوّان )
وان جاب بعض النّاس هرج النّميمه=ميّز كما ميز العقول الفهيمه
واحذر وبعض الضّن يحسب جريمه=( كم عاقل ايغرّه مع النّاس شيطان)
ولو يزرع الشّيطان بعض العداوات=بينك وبين اقآربك والصّداقات
لجل اللعين ايحب هدم العلاقات=( لولاه ماينشاف فالارض حدمان)
خلّك حريص برغبتك بالتّفاهم=قدّام يحصل بالمسائل تفاقم
واجه به اخصومك وبالحلّ ساهم=( ومن ياخذ ويعطي مع النّاس كسبان )
وان طوّل الوسواس صلّ وتضرّع=واعمل بيدنك والعقل لاتسرّع
والوقت بظهار الحقيقه تبرّع=( مهما يطول اغموضها لازم اتبان)
وصلاة جوف الليل تعمر حياتك=وبتلاوة المصحف تزيد احسناتك
ياالله عسى لاجات لحظة وفاتك=(نطق الشّهاده مايخيّب به لسان)
اعرف ترى الصّدقه تتطوّل بعمره=وتنجيه ميتة سوء وتيسّر امره
مـاتحتقر لو جابها بشـقّ تمره=( وللي عملها خير يرجح بالاوزان)
وابعد عنه لوكان نفسك تراودك=يجبرك بالوحده عن النّاس يبعدك
وماني على اللي فيه حسرات ميّدك=( لابد للمديون بالدّين ينهان)
والجار له حرمه حرامٍ تجيها=لو بانت الفتنه من اللي يبيها
مثل القرابه واجبٍ تحتميها=( ومن يحتمي جاره لقا خير وامان )
واستر عيوب النّاس لو تتضح لك=ولوتحسب اخطاها ماكبّرت عقلك
لوكان فيها غيض تسعى لقتلك=( ربّك يفشّل كيدهم كلّ مابان)
ولاتعلّق الخيبه على السّحر والعين=انته سبب خيبتك لو تفتكر زين
ممكن مطاوع للهوى والهوى شين=( ولاّ ظليمة ناس في بعض الاحيان)
انهض بعزمك خلّ عندك ايراده=وايّاك تيأس لو تشوف النّكاده
والرجل في عزمه يحصّل مراده=( مايفوق عزمك عزم ياعزم الانسان)
ولاشطّت احوالك وضيّق فمسعاك=وزادت بك اهمومك وكثروا لك اعداك
صلّي فجوف الليل يسعدك مولاك=( ولاتروح للي يستعينون بالجان)
ابعد عن اهل الشّرك ماينفعونك=مايفلحون بحلّ لو يوهمونك
في شركهم عن ديننا يبعدونك=( والشّرك ظلم وقالها العبد لقمان )
واعرف ملوك الجنّ لوهي فضيعه=ماهي بكفو اهل القلوب الشّجيعه
ايصيبها القلب الشَّجيع بفجيعه=(واللي قوي قلبه قويٍ بالايمان)
وفنهاية الطّاروق تبقى رساله=يعمل بها مثلك رجال الشّكاله
للدّار حق وتاخذه بالعداله=(وشّلون لو دولتك من عزّ الاوطان)
دار السّعود الغاليه مملكتنا=فيّها تهنّينا وهي مالكتنا
واملوكها في حكمها قدّرتنا=( نسعـى لوحدة صفّها شعبٍ اخوان)
واعلنّ ولائك لاطّاوع لحسّاد=ترسلّ سموم الهرج من دافع احقاد
اوغاد واللي طاوع لهرجة اوغاد=( اصبح مساويهم بالاوهام غرقان)
يادارنا عيشي بخيـر وسلامه=واللي تعرّض لك مصيره ندامه
ايموت مايلقى امكفّن عضامه=( عيشي بعزّك دونك الطّرف سهران )
هذا وصلّوا عد ماطار قرناس=واعداد ماخطّ القلم فوق قرطاس
على البشير المصطفى منذر النّاس=( وياالله تفتح لي لجنّتك بيبان )

ساعة بديت القاف والقاف مليان=حبر القلم ترجمّ ويملي له لسان
ينبيك عن واقع فياكان ماكان=(والتّرجمه حاضر بحاضر وفالحال)
يلقى بها القاري معاني توضّح=مثل المزاين بين شعلٍ ووضّح
ممّا وجد فالصّدر فضفضّ وفضّح=(شاعر جميل اسلوب في حبك الامثال)
جاب القصيده والجريدي مفوّه=رجّال فيه الخير فيه المروّه
الله عطاه العرف والعرف قوّه=(واللي يعرفه يشهد بكلّ ماقال)
رجّال وافي مايخون الرّفاقه=وايجود لضّيفان لو فيه فاقه
ولدّار والحكّام عهد وصداقه=(ولايخونها لو كان يشكي من اللال)
مذكور صدقه مامشى بالنّميمه=عزيز نفس وفيه طيبه وشيمه
ولايغدر الانسان لوهو خصيمه=(مشهود له بين الرّجاجيل رجّال)
والاحمدي خالد يقول الصّراحه=لو كان قوله يزعل اهل الوقاحه
ماعاد عندي فالمجامل مساحه=(ونهجي على نهج الكريمين لازال)
انا لقيت الظّلم ماله مبرّر=والله لابدّه بحقّي يقرّر
وحسبي على اللي بالخلايق يغرّر=(وابليس له مثله من الانس دجّال)
قامت عليّ اضروف الايّام تطغى=ونّيت منها واذنها لي مااصغى
عيّت معي تمشي على كيف ماابغى=(وبالصّبر اجمّلها عسى الهمّ ينزال)
وظلم البعيد اللي به الهمّ صالي=فاقه بجرمه جرم ظلم الموالي
اللي بعد لنّه شرب من دلالي=(عقّب بوسط الصّدر بالغيض زلزال)
وياكم صاحب كان عندي مقرّب=وانا له ابحزّات ضيقه مجرّب
واثره على الغدرات جندي مدرّب=(روحه وجيّه كلّها كذب محتال)
يبدي لي انّي صاحبه وابن عمّه=بسّ الحقيقه صحبتي ماتهمّه
مغسول وجهه بالمرق دون ذمّه=(يبغى يساوّم في رفيقه على اريال)
وياكم جار ايضيق من شوف جاره=لو كان ماضرّه يجيه ابعياره
وقت المكاسب فيه تقلب خساره=(تنعاف ياوقتٍ للاعدال ميّال)
وياحيف ياللي تخلفون النّوايا=ومن فوقكم واحد يشوف السّوايا
سبحانه اللي عالمٍ بالخفايا=(والرّعد سبّح له بحمده والاجلال)
الله ياطيب القلوب النّظيفه=تكبر سعادتها ولاهي كليفه
ناسٍ عفيفه والنّوايا شريفه=(ولاّ القلوب السّود فصدور الانذال)
والنّذل لو تعطيه سرّك يضرّك=خيرك معه يصبح على النّفس شرّك
ومنه العواقب دايماً ماتسرّك=(بعدك عن ادروبه ثمنّ راحة البال)
لاتصاحب الا حرّ فيه الفلاحه=وجهه سفير وفيه دين وسماحه
يمكن صلاحك للتقي مع صلاحه=(تقوى علاقتكم وتظفر بالآمال)
ولا تجاري اللي بالجهاله يجاهلك=اعفي عفو حكام وابدي تساهلك
يمكن يموت بغيض سبّة تجاهلك=(والحلم فالاخلاق رتبة جنيرال)
وابعد عن اللي لاعملته يشينك=يبقى فتاريخك معيّر سنينك
ولطّيبات اعزم وربّك يعينك=(العزم فيه البخت والرّب حلّال)
وياربّ ياعالي وداري بحالي=يامرسل الما بالسّحاب الثّقالي
ارضا عليّ وخلّ جنّتك فالي=(وبارك لي بحالي وجاههي وبالمال)
ياالواحد اللي ماخفى عنك خافي=نومن بعفوك من عذابك نخافي
اجعلّ لي التّوفيق ستر وعوافي=(وطالبك حنّبني شماتات عذّال)
وطالبك ورّدني على حوض مورود=حوض الذي له عندك امقام محمود
واعداد مافالبلّ حاشي ومفرود=(صلّي على المصدوق يافرد متعال)

قامت هاجوسي شافت الجوّ رايق=استاذنت منّي فبضع الدّقايق
تبغى تجيب من الشّعر شي شايق=( واهيا عوايدها تجيب الجزل فيه)
قالت هديّة معجباً في قصايدك=لحظة طلب مطنوخةٍ من جدايدك
يستاهل الاهداء وانته عوايدك=(وعدٍ وعدته ياالسّنافي توفّيه)
واتجمّلت من جاتني بالجزيله=وشكرتها والشّكر ردّ الجميله
هذي هاجوس اللي يقدّر زميله=( تشريف والتكميل في قاف نبنيه)
امجالسي منظوم لعيون ماجد=اللي غلاه بداخل القلب واجد
وبيني وبينه دايم ابليس هاجد=( وابليس مايقدر على انسان يخزيه )
ياماجد انته من قبيله تشرّف=تاريخها بالعزّ ماله محرّف
معروف ياماجد بليّا معرّف=( يوبي وفي حرب الابيّه عزاويه )
ومن بعد كيف الحال يابو مبارك=عذري على التّقصير يحفظ وقارك
ياالله عسى صومك وعيدك مبارك=( وعمرك مدي سلم وسعاده تباريه)
رجّال عاقل للحقايق تقصّى=فعلك وفكرك طوّع اللي تعصّى
وانته وصي منته بحاجه توصّى=( لاكن نذكّر ربّما شي ناسيه)
في طاعة الله لاتوانا ولاتملّ=ولاتبدّي الدّنيا على الدّين وتزلّ
ولوالديك اخفظّ جناحك من الذّل=(مايردّك الله في دعا كنت داعيه)
واختار فالاصحاب فرّاج ضيقك=ومحلاه لو يحسب صديقك رفيقك
واحذر عدوّك لايحرّش صديقك=( لنّ العدو يبغى عميلٍ يقدّيه )
ومافات لاتندم عليه ابفواته=والليل بالحسرات حذرا تباته
اللي نظر قدّام يغنم حياته=( واللي نظر للخلف خايب تهقويه)
وإذا عزمت لشي صلّ استخاره=وشاور ومن شاورك عطه استشاره
وبالمال لاتبذّر وصون ادّخاره=( المال للانسان يجلب تمنّيه )
يكرم به الضّيفان ويسدّ لازم=ويعين به وقت الكرب والمأآزم
وصدقه على اللي وقتنا فيه حازم=(ايمدّ مدّه من مصيبه تنجّيه)
الجود يابن الجود خصله شريفه=يلغي عيوب الشّخص لوهي كليفه
راعيه ماينعاف نفسه ضريفه=( وان همّ له في علم ربّه يقوّيه)
وامصاحب الاخيار منهاج خيره=وابعد عن الوسواس لاتجيك طيره
والعفو ينبي عن نقاء السّريره=( واللي عفى باحسان ربّه يجازيه)
وامصاحب الانذال يجلب ندامه=واهل النّمايم ماوراهم سلامه
والحقّ قوّه والشّجاعه كرامه=(والغدر منهاج النّذل مايخلّيه)
ومن يصغي اذنه يسمع لكل هرّاج=ايجرّ نفسه دون يدري للاحراج
ويخسر اناس لقربهم كان محتاج=(ولاينفعه بالوضع عذرٍ يبدّيه)
ومن خاف ربّه بالخدمّ والعماله=ويسعى على رزقه محلّل رياله
ايشوف فضل الله يحفظ عياله=( واللي قرا في سورة الكهف تنبيه)
وعامر بيوت الله مايعيش مخزي=والله للمحسن بالاحسان يجزي
وبالكسب لابدك على الفعل تعزي=( اللي زرعته لازم بيوم تجنيه )
ومن فرّج الازمات للنّاس يفرح=وامحال بين اعداه يهزم ويطرح
وان كان صابه قرح يسلم ويبرح=( ومن وين ماوجّه يواجه عوافيه )
والود بعض احيان يحسب معابه=وانشد عن اللي جرّبوا فالصّبابه
لو تابوا اهله مابروا من صوابه=( ملعون فيه الذّل والجور يشنيه)
وطاعة وليّ الامر فالشّرع واجب=ولاطّوع اللي للمعادي يواجب
والله خلق عين البشر تحت حاجب=( ومليكنا تاجٍ على الرّاس نحميّه)
واهل الشّرف بالعز تحفظ بلدها=وتحمى حدوده من حقودٍ حسدها
وجنسيتك من ذمّها واضطهدها=( الطمّ على وجهه لين فعلك يربّيه )
وعلى النّبي المصطفى مكمل الدّين=صلّي وسلّم ياحفيد الميامين
اعداد ماتسمع وماتشوف بالعين=(في صبح تصبح به وليلٍ تمسّيه )

الشاعر / نايف بن غانم الحبلاني=
الله على اللي خصرها شبر واشوي=وماجاوره بالعكـس صعـب اصطدامـه
بنتٍ صغيره ماقدر وصلها حي=ولا راجعت تشكي حسوس لسلامـه
ماطبها المحجام والفكس والكي=من نسل خاشقجـي عليها علامه
اسم امها سوزان واسم اختها مي=وحتى بجدتها تشوف الوسامه
ماحوّمت بالحمض واغراب واعطـي=ولا قيّلت مع ربعها بالثمامه
مصيافها مابين لبنان ودبي=ومابين قبرص وانقره والمنامه
حليمه وهيفا معاها ولا شي=حلوه وبطرانه وهيبه وقامه
ياصاحبي لاتقول لالا ماهي هي=هذا هوى بالي وغاية مرامه
والا السعوديه لها بالدّجـى ضي=شمعه ومصدرها الوفا والكرامه
هجوس سرّتني وانا بخاطري شي=وارجوك لاتلحق هجوسي ملامه
الشّاعر / خالد بن عبيد بن معتوق ألأحمدي=
الله على خطّك وصف زين بضبي=ياشاعرٍ يطلب نفسّر حلامه
توصف لي المجمول في وصف بوسي=ولاّ تلمّح لي بفاتن حمامه
خذها نصيحه من قبل تنطوي طي=الودّ لاتحرق ضميرك سهامه
انت بدوي ضاري علـى الشّمس والفـي=وتسري على مقصدك وقت الجهامه
دوّر مع البدوان عن زين مغري=اللي نظامك منطبق في نظامه
واعرف ترى بالودّ شـيطان مغوي=وميلك على الحضران يحسب هيامه
ملبوســك المعتاد ماهو لهم زي=تجبرك يانايف تطش العمامه
وان ودّتك لبنان ودتك للغي=ماشـوفها ياخوك ديرة زعامه
دار الزّعامه بالعرب ديرتي ذي=شعب وحكومه نشتهر بالصرامه
وان كان هاجوسـك سـرت سبّـة اصبـي=عزّي لمثلك مبتلش في غرامه

موتتك يابو متعبّ هزّة الكون كلّه=كنّه الكون موذنّ نفخة الصّور فيه
علّةٍ صابتك منها مفارقك علّه=وابكت اطفال شعبك يالشّجاع النّزيه
انت حاكم عظيم وعزّ شعبه بضلّه=وانت رمز العداله والخطا ماتبيه
فيك نهج الصّراحه والنّقا ماتزلّه=قلبك ابيضّ وشعبك طيبتك تحتويه
كامل اصفات ذاتك وهبة اللي تجلّه=ميّزك بالكرامه والخلق ياوجيه
الشّجاعه جبلّه والتّواضع جبلّه=والحكم ورث جدّك منته ابمشتريه
ناصر الملّه السمحه على كلّ ملّه=فيك دين وصلابه موقفك تحتميه
من نوى فيك شرّه مالقى غير ذله=ومن حكى فيك شين ايذمّ فيما حكيه
وكلّ قلبٍ فؤداك بالغلا يستحلّه=لاقي اهداية الله جلّ من يهتديه
عشت سلطان الارض وكلّ مقصد تصلّه=وغبت سلطان غالي كلّنا من ذويه
الله انّه يسكّنك القصور المطلّه=في جنانٍ بها تنعم بما تشتهيه
ومن بكى يوم موتك دلّ دمعٍ يهلّه=عن غلاتك ودمعه كنّه يقول إيه
موتتك يابو متعبّ هزّة الكون كلّه=كنّه الكون موذن نفخة الصّور فيه