واعذابي طحت ما بين روح ولا تروح = شفت برق التفرقه لاح في نو الكلام
لا متى والقلب حاير ومرتع للجروح = كل ما قلت اتفقنا طلع شبه انقسام
الحشا من حر فقدانه وجفوه يفوح = والزعل والضيق له بالمعاليق احتدام
نوّخ اركاب المواصيل واغتال الطموح = ما جنيت الا تعب ساقي وقل المنام
في زمن نضج العلاقه وروح تعز روح = شح في ربط التواصل وقصّر بالسلام
بعد ما عمرت في ساحة اماني صروح = يدني اركاب السفر مخلف اطبوع الحشام
كل ما جا للنهار الجديد اصدا وضوح = اتقلد من سلاح الجفا سيف وحزام
آه ياوقت ارتوي من صدر مزحه صبوح = والوفا سايد وطيبه وعزه واحترام
صار وضعه في تردي لا ضحك ولا مزوح = مفتقد شرطين شرط الغلا والانسجام
والله اني من حموله ولي قلبً نصوح = مير رق الحرف من مبسمه يخلف نظام
اكرمه ويمد لي كف يسراه الشحوح = نعنبو داره ما يعرف مفاهيم الكرام
عاشقه من قلب واللي مرافقنا الوضوح = باقي اسلمه محضر مقاليد المهام
قلت هذا اللي يحفظ السراير ما يبوح = يلمس احساسي ويدرا ويكتبني غرام
والصراحه لو رحل ! لا رجع للشوق روح = ماله الا قلب بابه كبر باب السلام

شاعر الحدث : نايف الحبلاني