السلام عليكم ورحمه الله بركاته
اخواني واخواتى اعضاء وزوار أفضل متلقى ,
ملتقى حرب الرائع والاكثر من رائع
أسعد الله جميع اوقاتكم بكل خير ,,,
بكل صراحة ان ما يجعلنى انثر بين اعينكم محاولاتى الشعريه
هو حقيقة ما يتمتع به هذا المنتدى من سمو و رقي بالشخصيات من اعضاء ومراقبين .
وهو بلاشك اكبر دافع يجعل المرء لا يتردد في أن يشارك بما يراه مناسبا
في هذا المنتدى
ملتقى حرب ويسعدني وكلي امل ان تنال هذة القصيده استحسانكم
ولكم من اجمل وارق التحايا .

امس قبل الخمس كنت ملزم ورديت=وحتى بعظمه لسانك وعدت العين بالجيه
واول مالقيت انك بعد مارحت انا ضليت=وانا جاهز لموعدنا ميه مليون بالميه
وحتى صورتك هذي تجي وتروح لا سهيت=لأن اللى لك بقلبي كثير ن ماهو بشويه
اذا مازاد ما ينقص ولو بيزيد به حسيت = بأن العقل بزود الحب يقل وينقص بليه
ترى حبك كبير كثير وانا والله ما ظنيت= بأني اقدر اتجاهل كلامن منك جا فيه
وغلاك اللى بوسط القلب حطيته وما خبيت= بأنك هاجسي الاول وافكر فيك يوميه
بس انك كذا فيني لا تفكر ولا اهتميت=ومن وقت العشا وحدي لآخر لحظه ليليه
تجي هالحين بالأعذار تقول اسمع انا مليت =انا اللى مل يا قلبي وصبري طال موليه
لقيتك ضايع بدنيا سكنت الشارع بلا بيت=تبكي ترتجف وشوي تقوم تحبها يديه
بحالٍ للعدو والله انا ماادعي ولا اتمنيت=دموع الحزن بعيونك تدور وقت حنيه
وبعد اذنك ابي ارجع لماضي حضرتك يا ليت=واذكر من نسي اصله وعاش بحال وهميه
ترى بدري على اشكالك تباهي بالاصل والصيت= وتنكر ماضي الايام وتتمناها ممحيه
وحط فبالك وركز وجرب فني التنصيت=عسى تفهمني هالمره وتبهرنى بعقليه
توكل وانقلع عني وحط فبالك ليا جيت=بأنك صرت لي ماضي ودستك تحت رجليه

وسلآمــــــــــتكمـ

وهذه القصيدة هي اول مشاركه لي
في هذا الملتقى
وقد كانت مطروحه بشكل غير منمق
وبعد مساعدة الاخ القناص لي في ايضاح كيفيه التنسيق لها
اطرحها مره اخى بين ايديكم

ياليل انا بانشدك وارجـو تـردي=بس انت وحدك للمحبيـن والـى
وابي جوابك يـا ونيسـي مسـدي=في سد بـاب الاسئلـه والمجالـى
وش هرجتك باللى مع الوقت صدي=ومن صدته عني جـرا ماجرالـى
لا تقول خله شوف وش يستجدي=مـدام قلبـه لـك رد الواصالـى
ودري يـرد يقـول يـدك ويـدي=نبقى سوا في سهلهـا والعوالـى
نثبت ونتحدى على اصعب تحـدي=حب القلـوب الصادقـه والمثالـى
وان كان قفا وابتعد بـلا مـردي=تراه ماهـو فـي حياتـى مبالـى
تـراه مـا هـو للمحبـه مبـدي=قربه وبعده وفـي حياتـى توالـى
لا بوه لا بو مـن تكبـر وصـدي=لا بو مشاعر عن حقيقـه تزالـى
اللى عطيته من مشاعر يسدي=ولاني براجي اللى مع الوقت مالى
ياليل رد ارجـوك يـا ليـل ردي=قولي سليـم وصـح والا خيالـى
لم لم نجومه والقمـر واستعـدي=ومع طلعت الضو لي تهادى وقالي
من باع صادق حب واحساس ودي=عسـا حياتـه تنتهـي بالزوالـى
وعساه ما يلقـى يدينـن تمـدي=ولا يرحمه ربي عزيـز الجلالـى

وسلاآمتكم
اجمل واعذب تحيه للاخ / ابو روان
وشاكر ومقدر له اهتمامه بنا كمواهب
وهذا ان دل على شي فانما يدل على
رقي شخصه وسعد صدره .
اما بالنسبه لتعليقه على احد ابيات قصيده " ايـــــه هيّن !! خل عني بس !!"
سابقة كان فيها هذا البيت:

انت تدري انا منهو انا عازم يا غبي= قلبي الطيب ذبحته ومستحيل انى اميل

اود ان اوضح
ان المقصود بـ عازم هو اسمي
حيث ان العاني هو اخوكم عازم بن فاطم الحربي
ولكم مني كل التقدير والاحترام وتقبلو تحياتى ...

الـعـــــاني